ПРОЕКТ ДЕТАЛИ

Во моментот во населените места во Општина Ново Село постојат многу земјени улици кои поради нивната сегашна состојба го отежнуваат движењето на населението и нивната поврзаност со останатиот дел од општината. Таков е случајот со населеното место Мокрино, каде сегашната состојба е доста неповолна. Земјената улица, која е предмет на овој предлог проект и има потреба од реконструкција, при обилни врнежи од дожд или снег се претвора во каллив терен кој дополнително го отежнува движењето и поврзаноста на населението. Ова доведува до постојана ерозија и постојана потреба од полнење на новоотворени дупки со уште повеќе земја. Во топлите периоди во годината, земјената улица е доста сува и при движење на моторните возила или при појава на ветер, се создаваат услови за кревање и разнесување на големи наноси на прашина со што се загадува воздухот на семејствата кои живеат директно на оваа улица. Според Одлуката за определување на подрачјата со специфични развојни потреби во Република Северна Македонија во периодот 2020 - 2024 година („Сл. Весник на РСМ“ бр. 263/19) населеното место Мокрино, Општина Ново Село е определено како „погранично“ и како „рурално подрачје“ и спаѓа во Листа бр. 1 од Одлуката. Овој предлог проект се однесува на реконструкција на постоечка улица – улица бр. 7 во населеното место Мокрино, Општина Ново Село. Предметната улица опфаќа вкупна должина од 338,27 метри. Населеното место Мокрино, Општина Ново Село има 449 жители според попис од 2021 година. Тоа е 6,44% од вкупно 6972 жители во Општина Ново Село. Бројката на директни корисници и уживатели на услугата односно реконструкцијата на улиците ги засега 80 граѓани. Ова претставува 17,89% од вкупното население на Мокрино. Сепак оваа улица е користена од сето население на Мокрино бидејќи истата води директно до земјоделски површини кои се основен извор на егзистенција на жителите на Мокрино. Предметната улица е во употреба од кога постои селото и истата нема соодветна коловозна конструкција, односно постоечката улица е земјена. Поради лошата состојба во која моментално се наоѓа предметната улица и нејзиното влијание врз безбедноста на сообраќајот, како и безбедноста на жителите се наметнува потребата од реконструкција на истата. Предметната улица, која е дел од овој предлог проект, беше избрана за приоритетна од страна на населението на состанок со градоначалникот одржан во склоп на граѓански собир на локалното население на Мокрино. Реконструкцијата на улицата е важна од неколку аспекти меѓу кои се здравјето и безбедноста на жителите кои живеат во непосредна близина како и од земјоделски аспект, со решавање на горенаведените проблеми директно ќе се влијае врз стимулирање на земјоделското производство и зголемување на безбедноста при обработка на земјоделските површини