ПРОЕКТ ДЕТАЛИ

Туризмот е дел од исконската љубопитност, желбите и активностите на човекот за осознавање на светот околу себе, па затоа има многу брз тренд на развој, како во светот, така и кај нас во Македонија. Туризмот на луѓето им нуди содржинско користење на слободното време надвор во природа, места кои со својата природна и социјална карактеристика се основа за нови атрактивни доживувања и за релаксирање. Туризмот како стопанска гранка има значаен придонес и за економскиот развој на секоја земја. Во Југоисточниот плански регион постојат можности за развој на широк спектар на туристички активности поврзани со повеќе видови на туризам. Имајќи во предвид дека постојат предели кои се еколошки незагадени, постојат големи потенцијали за развој на руралниот туризам, што може да придонесе до зголемени економски ефекти за овој регион. Ова е посебно важно за развојот на туризмот и во помалку развиените општини во регионот. Како резултат на своите природни особености, Југоисточниот плански регион се карактеризира со изразени економски активности во областа на туризмот. Со помош на туризмот се зголемува економскиот раст и развој на земјата, се привлекуваат нови инвестиции, се креираат нови работни места, се подобрува животниот стандард. Туризмот, исто така помага и за стимулирање на локалната индустрија и трговија, промовирање на локалните бизниси и занаети, за промовирање на културните вредности и природните богатства. Tрите општини од Југоисточниот регион (Богданци, Василево, Ново Село) партнерски се обединија во овој проект, со цел збогатување на туристичките содржини во регионот во кои ќе можат да уживаат туристите преку целата година.