ПРОЕКТ ДЕТАЛИ

Проектниот контекст и проблем кој се надминува со предложениот регионален проект се однесува на проблемот со интензивното користење на фосилни горива и емисија на загадувачки материи во воздухот преку постоечките грејни системи на јавни општински објекти од регионот поради ниските стандарди на енергетска ефикасност. Ефикасната потрошувачка на енергија е еден од најприфатливите начини за намалување на штетните ефекти од климатските промени и проблемите поврзани со здравјето. Енергетски ефикасните објекти го намалуваат загадувањето на воздухот, бидејќи обезбедуваат почисто согорување и подобра вентилација од конвенционалните градежни објекти. Како резултат на тоа, се намалува и можноста за болести поврзани со загадувањето на воздухот. Енергетски ефикасните објекти ги намалуваат финансиските и социјалните трошоци за лекарски третмани, но исто така и ја зголемува вредноста на објектите. Реализацијата на овој регионален проект ќе резултира во значително намалени емисии на загадувачки материи во воздухот и поквалитетен стандард на учење и работење во образованието во регионот, како и во економски заштеди на општинските буџети за греење на долг рок. Општина Кичево: Објектот кој е предмет на реконструкција се наоѓа на КП 1964/1, КО Кичево 8, Општина Кичево. Реконструираниот објект ја задржува постојната спратнот П+1 (приземје и едно ниво). Преку скалишното јадро се обезбедува пристап до подрумот и до првото ниво. Парцелата има површина од 440 м2, земјиштето под зграда е со површина од 255 м2, а нето површината на објектот изнесува 198 м2. Според извршеното мерење на лице место, нето површината на првото ниво изнесува 263,31 м², а нето површината на приземјето изнесува 18,31м². Вкупната нето површина на постојниот објект која е предмет на реконструкција изнесува 281,62 м2. Функционално објектот е поделен на два независни дела: приземје и прво ниво. На приземјето се позиционирани деловни и комерцијални простории кои се од други сопственици и до нив се пристапува директно од тротоарот на ул. „Маршал Тито“. Првото ниво претставува независен простор до кој се пристапува преку скалишното јадро. Преку него се пристапува до подрумот кој моментално е нефункционален, полн со отпад и е одделен со врата од влезниот простор. На приземјето преку подестот од скалишното јадро се пристапува до тоалетите. Постојат два тоалети: машки и женски. Преку подестот на првото ниво се пристапува до една независна канцеларија од останатите и до ходникот преку кој се пристапува до останатите канцеларии. Таа канцеларија е позиционирана на западната страна, а скалишното јадро и влезот се ориентирани кон исток. Постојниот ходник поминува по должина на целиот објект и од двете страни на ходникот се позиционирани постојните канцеларии. Во рамките на овој проект се планираат повеќе активности, како што се замена на прозорци и врати, ѕидарски работи, лимарски работи, хидро и термоизолации, замена на подови, фасадерски работи, електрични инсталации и други градежни завршни работи. Општина Вевчани: Согласно проектната задача предвидена е реконструкција на системот за греење. Како извор на енергија за греење се предвидени 2 топлински пумпи кои се приклучиуваат на постоечката инсталација. Предвидени се две наместо една топлинска пумпа заради подобра функционалност на инсталацијата, помал ефект на дефрост на системот и заради обезбедување на сигурен капацитет од 50% во случај на дефект на едната пумпа или редовно сервисирање. Главната инсталација е стара и изведена со црна челична цевка, во добра состојба. Делови од инсталацијата се нестручно додавани во минатото со бакарна цевка и заради мал дијаметар на цевката циркулацијата на овој дел е недоволна. Корекциите во цевната мрежа се токму во овој дел. Грејните тела се постоечки алуминиумски и гусани радијатори, во добра општа состојба. Исто така, со втората интервенција на овој објект, цел е да се дојде до реконструкција на детската градинка, односно со нови материјали и замена на веќе оштетената опрема. Фактичката состојба која треба да биде предмет за обработка, тоалетот за вработените и помошните простории сe со вкупна површина од 56.98 м2, а целокупната површина на објектот е со корисна површина од 577.27 м2. Потребно е да се предвиди реконструкција на ѕидни облоги и предвидување на нови, отстранување на подни плочки со замена на нови, и замена на дрвени столарија со нова пвц столарија – врати и прозори. Во останатиот дел од градинката потребно е да се предвиди промена на подни керамички плочки кои се веќе оштетени и замена на одредени позиции на дрвената столарија со нова пвц столарија, врати и прозори. Општина Охрид: Во детската градинка „Јасна Ристеска“- објектите “Лихнида” и “Росица” се предмет на реконструкцијата. Подовите во санитарните јазли се изведени од подни керамички плочки фуга на фуга и лепени со цементен малтер. На овие делови има физички оштетувања како на подните така и на ѕидните површини. Аналогно на тоа се појавува влага по околните ѕидни површини, нешто што негативно влијае врз здравјето на децата кои се таму згрижени. Исто така има поголеми оштетувања врз самите санитарни уреди како што се ВЦ шољи и чешми, вц казанчиња и слично. За таа цел се предлага одстранување на керамичките плочки во подовите и ѕидовите со одвоз на истите до депонија за градежен шут, а потоа да се изврши хидроизолација на подовите и ѕидовите во висина од под до плафон, а потоа да се лепат ѕидни односно подни керамички плочки. Откако ќе се изведат овие градежно занатски работи да се изврши монтажа на санитарните уреди, ВЦ шољи со ниски казанчиња, чешми и друг вид изливни места. Општина Дебрца: Зградата на Општина Дебрца е лоцирана во с.Белчишта, на КП-1864/3 во КО Белчишта. Во склоп на Општинската зграда има и повеќенамеска сала за состаноци, собири, презентации и сл., а исто така во склоп на Општинската зграда се наоѓаат и просториите на Јавното комунално претпријатие “ДЕБРЦА”, с. Белчишта. Површината на објектот е 850 м2 (нето) или околу 1300 м2 (бруто), кој се состои од приземје и еден кат. Најголем проблем е недостатокот на работни канцеларии, а за истите потребно е да се најде проектанско решение во приземјето во објектот. Предвидено со проектот е да се направи целосна изолација на подовите, ѕидовите и таваните на објектот, надворешна термофасада, нова електрична инсталација и водовод и канализација.