ПРОЕКТ ДЕТАЛИ

Кањонот Матка со своите убавини, стрмните литици на планините високи и до 1000 метри, како и на прекрасните пештери и живописни средновековни манастири, е најатрактивна туристичка локација во Скопскиот регион која привлекува голем број, не само домашни туку и странски туристи. Подводната пештера Врело, која е номинирана за ново 7-мо чудо, е сместена во кањонот Матка од десната страна на реката Треска. Се претпоставува дека пештерата Врело е длабока 330 метри, односно дека е најдлабока подводна пештера во светот. Таа е најубавата пештера во кањонот која нуди несекојдневно доживување како за активните спортисти – планинари, спеолози, нуркачи и сл, така и за сите оние кои сакаат само да уживаат во прошетката помеѓу прекрасните скулптури од сталактити поставени на таванот на пештерата. Движењето низ пештерата е овозможено од делумното осветлување кое во моментот е поставено во пештерата. Но, поради ограниченото напојување, тоа не е постојано и се користи само во одредени моменти. Ова допринесува делови од пештерата да не се доволно или пак воопшто не се осветлени, што не само го скратува доживувањето на убавините на пештерата туку и претставува безбедносен проблем за посетителите. Исто така на пешачката патека нема поставено противпанично осветлување, што го прави движењето во и надвор од пештерата доста ризично. Проблемот со недоволното осветлување би се надминал со доработка и надградба н постојаната состојба со елктрична инсталација поставена во пештерата Врело. Со поставување на новата електрична инсталација би се потенцирале одредени зони со поставување на нови или комбинација со постоечки рефлектори, линиски ЛЕД светилки и ЛЕД РГБ светилки со цел оформување на визуелна димензија на целиот воздушен и подводен простор во пештерата. Со ова исто така би се зголемила и безбедноста на движењето на посетителите, со што би се зголемил бројот на посетитлите, а истовремено ќе им се овозможи целосно да ги доживеат убавините на пештерата, а ќе обезбеди подобри услови за развој на туризмот и во соседните плански региони како Полошкиот регион.