ПРОЕКТ ДЕТАЛИ

Патниот транспорт и инфраструктура играат клучна улога во економскиот развој, зголемувањето на бројот на туристите во регионот, подобрување на комуникацијата меѓу граѓаните од околните населени места, пристапот на земјоделците до своите ниви и до пазарите на големо и развивање на современа и функционална инфраструктура, како и на животниот стандард на населението во целост. Регионалните патишта обезбедуваат пристап до главните патни коридори и магистралната патна мрежа и заедно со локалните патишта се од големо значење за развојот на локалната економија, привлекувањето на нови инвестиции, мали бизниси и земјоделски активности низ земјата. Во структурата на превозот на стока која се транспортира по патиштата низ Република Македонија, националниот превоз доминира над меѓународниот и транзитниот превоз. Исто така, патниот превоз доминира над железничкиот превоз. Во моментот, вкупната должина на патната мрежа во државата изнесува 14.395 км, од кои 242 км се класифицирани како автопатишта, 911 км се магистрални патишта, 3.771 км регионални, а 9.258 км се локални патишта. Од тука може да се заклучи дека патната мрежа во Република Македонија претставува добра почетна основа за понатамошен развој како на национално така и на регионално ниво. Како во другите региони, така и во Југоисточниот регион, патниот транспорт има најголемо учество во вкупниот превоз на стока и патници. Од вкупно 14.395 км патна мрежа во Република Македонија, на територијата на Југоисточниот плански регион поминуваат 1.557 км или 10,46% и тоа следните патишта: „А“ во должина од 132,1 км, регионални патишта 536,9 км и локални патишта во должина од 888 км, што може да се заклучи дека регионот задоволувачки комуникациски е поврзан. Патната инфраструктура е добро развиена во Југоисточниот регион, иако постојат услови за нејзино подобрување. Должината и квалитетот на локалната патна инфраструктура се задоволителни и не се под европските стандарди. Трендот на зголемување на должината на асфалтните патишта е позитивен. Сепак потребни се нови локални патишта и подобрување на постоечките патни правци, особено помеѓу населените места во општините и помеѓу општините. За реализација на Програмата за локален и економски регионален развој на Општина Струмица како и на соседните општини, се утврди потребата од страна на локалното население за изградба на локалниот пат с.Муртино – с.Еднокуќево и на основа на приоритизирање на овој проект од страна на граѓаните, Општина Струмица пристапи кон подготовка на проектна документација, односно Основен проект за изградба на локален пат с.Муртино– с.Еднокуќево. Општина Струмица го аплицира овој проект до БРР во рамките на Програмата за рамномерен регионален развој за 2016 година, Проекти за развој на селата, меѓутоа заради ограничениот буџет на Бирото за регионален развој, се заврши само со првата фаза на овој предлог- Проект, односно обележување на трасата, земјени работи со тампонирање и одводнување, меѓутоа не се изврши асфалтирање на изградениот пат со што патот не беше во можност да се пушти во употреба. Првата фаза од Предлог-проектот “Изградба на локален пат с. Муртино и с.Еднокуќево или тампонирањето на локалниот правец е реализиарно заклучно Октомври- Ноември 2016 година и со тоа се наметнува потреба од брзо и навремено реализирање на втора фаза асфалтирање со што целосно ќе се имплементира основниот проект. Пред имплементирањето на првата фаза, овие населени места беа поврзани само со локален колски пат и сите корисници беа принудени да го користат подолгиот постоечки пат. Со имплементацијата на проектот, односно со изградбата на овој локален пат, патниот правец на овие населени места ќе се намали од 5.200 на 1.950 метри. Со втората фаза ќе се реализира општата цел од основниот проект, односно изградбата на локален пат помеѓу населените места с.Муртино- с.Еднокуќево. За проектот да биде успешно и целосно реализиран предвидено е што побрза реализација на втората фаза со која ќе се изврши асфалтирање на патот, а со тоа ќе се финализира основниот проект. Целта на овој проект е да се изгради локален пат што ќе ги поврзува селата Муртино и Еднокуќево во должина од околу 1390 м. Со овој проект ќе се оствари Стратешка цел 4: Осовременување и проширување на сообраќајно- транспортна инфраструктура од Програмата за развој на Југоисточниот плански регион 2015-2016 со што ќе се осовремени и прошири сообраќајно-транспортната инфраструктура на патниот правец кој поврзува две населени места од две соседни Општини: Еднокуќево од Општина Босилово и с. Муртино од Општина Струмица. Проектната идеја е од големо значење и за Ново Село бидејќи ги поврзува трите општини и ќе биде од голем бенефит за граѓаните од сите три општини кои секојдневно ќе го користат овој патен правец. Подобрената патна инфраструктура ќе овозможи олеснета комуникација помеѓу трите општини, побрз и побезбеден транспорт на патници и стока, а од најголемо значење ќе биде за земјоделците кои секојдневно ќе можат да го користат овој пат со цел полесно пристигнување до земјоделските површини и пренесување на готовите производи до пазарите кои се наоѓаат во близина на микро- регионот. Со изградбата на патот станува јасно дека брзината и удобноста на транспортот ќе се зголемува, а сообраќајот ќе се намалува. Во пределот на овие три општини се наоѓаат туристички локалитети кои се значајни за развојот на локалниот туризам. Со изградбата на локалниот пат, корисниците брзо и удобно ќе пристигнат до водопадите кои се наоѓаат во селата Габрово, Колешино, Смоларе, до Бања Банско и Моноспитовско Блато. Откако ќе се пушти во употреба локалниот пат ќе биде овозможен лесен пристап до Моноспитовско Блато кое се наоѓа на околу 400 хектари во атарот на с.Моноспитово. Истото од 2009 година со одлука на Владата на РМ е заштитено како споменик на природата, а неговиот статус како споменик на природата го штитат и ратификувани меѓународни конвенции. Моноспитовското блато е музеј во природата на ретка флора и фауна што го прави актракција и огромна можност за развивање на локален туризам на подрачјето на општина Босилово, место ке би сакале да го посетат домашни и странски туристи кои уживаат да ја видат ретката флора и фауна. Со изградба на локалниот пат и пристапот до блатото ќе се овозможи основниот предуслов за брз развој на тој тип на туризам. Воедно, изградбата на патот ќе овозможи подобра заштита од загадување бидејќи ќе има олеснат пристап на службите за одржување на чистота и за заштита на животната средина, флората и фауната, како и заштита од човечката несовесност. Изградбата на локалниот пат од с.Муртино до с.Еднокуќево до крајна фаза асфалтирање и негово користење ќе биде од голема важност за граѓаните од овие населени места бидејќи ќе се оствари поголема соработка помеѓу трите општини, како и подобрување на локалниот економски и туристички развој.