ПРОЕКТ ДЕТАЛИ

Развојот на патната инфраструктура е еден од основните услови за интензивен одржлив развој на еден регион. Во ситуација кога патниот транспорт е единствениот вид на транспорт во поголемиот дел од еден регион, значењето кое го има патната инфраструктура за овозможување на одржливиот развој на регионот повеќекратно се зголемува. Развојот на еден регион зависи од повеќе фактори. Еден од позначајните е квалитативниот и квантитативниот степен на изградба на физичката инфраструктура. Секое општество се стреми кон овозможување на повисок и поквалитетен животен стандард на граѓаните, што во суштина значи и константно подобрување на условите за живот. Од вкупно 9570 км локална патна мрежа во Република Македонија, на територијата на Југоисточниот плански регион поминуваат 902 км или 9,42% (Според Државен завод за статистика за 2015 година). Локалните патишта се најзастапени во вкупниот број на категоризирани патишта во патната мрежа во државата, но и во Југоисточниот плански регион. Целокупната патна мрежа во Југоисточниот плански регион може да се смета за средно развиена поради што постојаното подобрување, рекострукција и изградба на нови патни делници е од особена важност. Југоисточниот пански регион е земјоделски регион. Пристапноста до земјоделските површини, но и безбедниот транспорт на земјоделските производи до откупните центри, пазарите и преработувачките капацитети е еден од основните предуслови за квалитетно земјоделско производство. Патниот правец с. Чанаклија - с. Нова Маала, општина Василево е во должина од 4.02 км и спаѓа во категоријата на локални патишта. Неговата изградба е започната уште во 2013 година со што до сега има изградено само 1,3 км од патот како и мост на река Погана. Изградбата не е довршена при што постојниот земјен пат е во многу лоша состојба и е тешко проодлив за моторни возила особено по врнежи на дожд и снег. Поради ваквата состојба т.е непостоењето на модерна патна инфраструктура отежната е и оневозможена комуникацијата на населението од овие две населени места и со населеното место Доброшинци, понатаму со другите населени места од општина Василево, но и поврзувањето со населените места од општините Струмица и Босилово. Овој патен правец е особено важен за околу 40 деца, ученици од с. Чанаклија кои секојдневно патуваат на овој патен правец и посетуваат настава од шесто до деветто одделение во ОУ „Атанас Невичански“ во Нова Маала. Постојниот патен правец им создава потешкотии при секојдневното патување до училиштето по најразлични временски услови и го продолжува времето на патување на учениците. Користењето на постојниот пат или околните патишта предизвикува проблеми за земјоделците и тоа зголемени трошоци за транспорт и загуби поради намалување на квалитетот на земјоделските производи. Со непостоењето на овој патен правец населението од општина Василево поминува 20 км за да се поврзе преку с. Хамзали со општина Босилово и општина Ново Село, како и со општина Берово во Источниот регион, со што овој локален патен правец добива и меѓу-регионално значење. Со изградбата на овој локален патен правец ќе се подобри комуникацијата меѓу граѓаните од населените места Чанаклија, Нова Маала и Доброшинци, кои заедно имаат околу 670 домаќинства или околу 2450 жители. Овој патен правец е од особено значење за учениците од Чанаклија од шесто до деветто одделение, кои секојдневно патуваат до училиштето во Нова Маала. Со комплетирањето на овој пат ќе се скрати времето на патувањето на учениците до училиштето и ќе се подобрат условите при патувањето. Од друга страна пак асфалтирањето на овој локален пат значи подобрување на локалната патната инфраструктура на ниво на Југоисточниот плански регион, реализација на уште една потреба на граѓаните, а ќе се подобри и транспортот на земјоделските производи. Ќе се овозможи граѓаните од овие населени места да се поврзат со патот А4 до граничниот премин Ново Село кон Р. Бугарија. Значително ќе се намали патувањето на граѓаните кои наместо 20 километри, со изградбата на овој патен правец ќе патуваат само 4 км за да се поврзат со општина Босилово и општина Берово преку регионалниот пат Р-1302. Развојот на туризмот во регионот е тесно поврзан со обезбедување на соодветна патна инфраструктура, со обезбедување на соодветни инфраструктурни услови ќе им се овозможи на жителите од овие населени места лесен пристап до туристичките локалитети во Југоисточниот и Источниот регион. Во иднина покрај овој патен правец општина Василево планира оформување на индустриска зона со изградба на винарска визба, како би им се излегло во пресрет на земјоделците од овој крај кои претежно се занимаваат со одгледување на лозови насади. Во таа насока општина Василево веќе изработува урбанистички план за две винарски визби но и пет парцели за фотоволтаични системи за производство на струја. Според погоре кажаното, значењето на овој патен правец во подогражденскиот појас е големо. Истиот ќе биде пристапен пат до индустриска зона во општина Василево, а во исто време ќе овозможи поврзување на целиот подогражденскиот појас и ќе биде пат кој ќе биде поврување со магистралниот пат А4 па се до регионалниот пат Р-1302 што води кон Берово. Изградбата на овој патен правец се одвива во неколку етапи при што со бараните средства проектот нема да биде целосно реализиран. Проектот се состои од следниве фази: 1. Во 2013 година со финансиски средства обезбедени од Европска Банка за реконструкција и развој изграден е еден дел од овој патен правец почнувајќи од населеното место Нова Маала во должина од 1,3 км; 2. Во втората фаза во 2014 година со финансиски средства обезбедени од Агенцијата за финансиска поддршка во земјоделството и руралниот развој изграден е мост на река Погана; 3. Во оваа фаза со финансиските средства со кои се аплицира до Бирото за регионален развој планирано е да се изгради уште еден дел од патниот правец правец Чанаклија – Нова Маала и тоа почнувајќи од с. Чанаклија во должина од 1км; 4. Понатаму во последната фаза ќе се бараат финансиски средства да се изгради и остатокот од патот во должина од 2 км со што ќе се комплетира целосно патниот правец Чанаклија – Нова Маала. Изградбата на локалниот патен правец се состои од изработка на комплетна нова коловозна конструкција, дефинирање и уредување на банкини, изработка на хоризонтално и вертикално решение и решавање на одводнувањето од атмосферски води. Изградбата на патниот правец Чанаклија – Нова Маала води кон подобрување на патната инфраструктура во регионот и подобрување на условите за живот и работа на граѓаните со што се овозможува поголем економски развој на целиот Југоисточен регион.