ПРОЕКТ ДЕТАЛИ

Општина Демир Хисар е рурална земјоделска општина која географски се поврзува со најмалку 5 други Пелагониски општини а низ која, поради одличната патна поврзаност, секојдневно гравитираат неколку илјади жители на Крушево, Битола и Кривогаштани. Во моментот, општина Демир Хисар нема организиран, систематски, функционален и безбеден простор за продажба на земјоделските производи кои се произведуваат на нејзина територија или на територијата на соседните земјоделски општини. Во Демир Хисар, бројката на земјоделци кои се или локални производители или доаѓаат од соседните општини Кривогаштани, Могила, Ресен (поради различни пазарни денови со Демир Хисар) и ги продаваат своите производи изнесува најмалку 100, а пак бројката на купувачи на земјоделски производи, пред се, од Демир Хисар, Крушево и Битола изнесува најмалку 2.000. Трговијата со регионални земјоделски производи (јаболко, раноградинарски производи, бостан, овошје - во зависност од сезоната) е значаен потенцијал за зголемување на регионалната конкурентност на Пелагонија, но истата мора да се практикува на структуриран начин, во функционален и безбеден простор согласно современите стандарди и прописи. Со проектот, ќе биде надмината неорганизираната трговија со регионални земјоделски производи и ќе биде воведен организиран систем на продажба на функционална и заштитена локација.