ПРОЕКТ ДЕТАЛИ

Во 2021 година, со финансиска поддршка од ФИТР, Маркет Висион започна со реализација на проектот Софтвер за автоматизација на маркетинг активности. Со овој проект беше креирана алатка која им помага на компаниите да ги поедностават и автоматизираат своите маркетинг активности со користење на софтверско решение кое овозможува детален и интерактивен преглед на сите трансакции на купувачите во избран временски период, автоматска селекција на таргетирана група на купувачи, брзо и едноставно креирање на промотивна понуда и праќање на истата до купувачите. Во моментот, ова софтверско решение е во фаза на имплементација кај првиот клиент, компанијата Рептил. Во процесот на имплементација утврдено е дека за максимално искористување на можностите на софтверското решение клиентот треба да ангажира најмалку две лица кои ќе ги дефинираат условите на промотивните понуди врз основа на добиени инпути од комерцијалното работење. Оваа ситуација ни укажа на неколку потенцијални проблеми и тоа: • навременост и точност на добиените информации од комерцијалното работење, • субјективно дефинирање на условите на секоја промотивна понуда, • ограничен број на промотивни понуди кои ангажираните лица би можеле да ги креираат за таргетирање на различни групи на корисници во даден временски период. Оттука потекнува идејата за креирање на посебен модул и алгоритам кои ќе функционираат на база на вештачка интелигенција и ќе вршат оптимизација на промотивните понуди врз основа на однапред дефинирани инпути и параметри, клучни комерцијални цели и секако податоците за купувачкото однесување на крајните корисници. Овој модул ќе им овозможи на компаниите да ги автоматизираат своите маркетиншки напори, без да се потпираат на стручноста на своите вработени во делот на дефинирање на условите за секоја поединечна промотивна понуда и без да бидат ограничени во однос на бројот на различни понуди генерирани и испратени во одреден временски период. На овој начин се врши комплетна автоматизација на маркетинг активностите на клиентот со единствена обврска на одговорните лица на компанијата да учествуваат во почетната фаза на дефинирање на комерцијалните цели на компанијата и нивно рангирање според приоритет.