ПРОЕКТ ДЕТАЛИ

Економскиот и општествениот развој на ЈЗПР зависи од степенот на поврзаност и пристапност до расположливите ресурси, современата комуналната инфраструктурна опременост и уреденост на просторот. Затоа инфраструктурната изграденост, во оваа смисла, претставува незаобиколен фактор за развојот на Југозападниот плански регион. Секторот за комунални услуги се однесува на категорија на претпријатија кои ги обезбедуваат основните- суштински потреби на населението, како што се водоснабдувањето, одведување на отпадни и на атмосферски води, управувањето со комунален отпад, уреденост и опременост на јавните простори, и застапеноста на другите сродни активности што се од јавен интерес за граѓаните. Комуналните претпријатија управуваат со значајна инфраструктура, и од тој аспект тие имаат потреба од континуиран прилив на средства за финансирање на тековното одржување и надградбата на инфраструктурата, како и набавка на нови средства, за подобрување на степенот на услугите што ги вршат. Комуналните услуги играат витална улога во економскиот и социјалниот развој на општините. Локалните власти, но и централната власт, се одговорни за обезбедување сигурен универзален пристап до комуналните услуги, во согласност со регулаторните рамки. Целта на овој проект е да се зајакнат капацитетите на јавните комунални претпријатија кои функционираат во општините во Југозападниот плански регион. Во тој контекст подолу се објаснати потребите од набавка на возила, механизација и други средства со кои ќе се осовремени опременоста на ЈКП во деветте општини од Регионот.