ПРОЕКТ ДЕТАЛИ

Планските региони во РМ се релативно добро покриени со магистрални и регионални патишта. Меѓутоа, како и во целата држава, така и во Југозападниот плански регион, локалната патна мрежа главно е во лоша состојба, а на одредени делници квалитетот е на многу ниско ниво што претставува потенцијална опасност за нормално одвивање на сообраќајот. Последнава декада со користење средства од Светска банка, од Министерството за транспорт и врски, како и од самите општини, дел од локалните патишта се реконструирани и надоградени (3,4%). Со исклучок на Скопскиот, Вардарскиот и Полошкиот, во сите други плански региони состојбата на поголемиот дел од главните магистрални, регионални и локални правци не е во согласност не само со барањата за економски развој, туку и со стандардите за безбедно одвивање на сообраќајот. Неколку делници и од магистралните патишта се во исклучително лоша состојба и тоа, пред сè, поради фактот дека се изградени пред 30-40 години, и не се соодветно одржувани и навремено реконструирани. Покрај тоа, карактеристика за сите региони е недоволната развиеност и квалитет на локалната патна мрежа. Ова, пред сè, е последица на недоволното одржување на истата, и недоволните инвестиции во овој вид на инфраструктура. Слабата развиеност на локалната патна мрежа е особено карактеристична за ридско-планинските области во секој од регионите ( а што е своевидна типичност на ЈЗПР). Подобрувањето на патната инфраструктура е од искључително значење за развојот на регионите, имајќи предвид дека високата концентрација на населението во урбаните средини е неповолна за развојот, а несоодветните локални патишта не овозможуваат развој на туризмот и другите економски дејности за кои ЈЗПР има огромен потенцијал (особено во руралните области, надвор од познатите и развиени туристички дестинации). Со проектните активности е предвидено во најзначајниот туристички центар во државата- Охрид - да бидат преземени чекори за подобрување на комуникациските врски во рамките на старото градско јадро. Така, во централното подрачје, потребно е да се извршат зафати за реконструкција на улицата Коста Абраш и оплеменување на малиот плоштад околу локалитетот Табана, вкупно околу 500 м2. Улицата Коста Абраш е “влезна” сообраќајница за стариот дел на градот, и затоа е неминовно да се извршат зафати што ќе значат нејзино осовременување/модернизирање, како и на облагородување, односно оплеменување на плоштадот околу неа со современи архитектонски и хортикултурни содржини, бидејќи точно оваа зона е своевидна - почетна - стојалишна точка на туристите од која се посматраат визурите на стариот дел на Охрид. Вевчани, е една од најпосетуваните рурални туристички дестинации во РМ, која изобилува со голем број природни реткости и локалитети. Оваа населба е позната и по културното богатство, како и старата архитектура, што Вевчанци ја носеле од разни краеви на светот. Покрај овие карактеристики, Вевчани во нашата земја и светот најпознато е по традиционалниот “Вевчански карневал“, кој преставува еден голем, отворен театар, интересен за домашните и странски посетители. Со цел да се осовремени инфраструктурата на оваа туристичка дестинација ќе се преземат повеќе активности за подобрување на локалната патна мрежа што води до одредени специфични микро-локации во самата населба. Во таа насока, ќе се изградат и уредат пет улички (Попеј – Бебекој; Пупини – Ќежој; Ќежој 1; Костојчини 3, и Алулој – Гогој) во должина од 630 м. Општина Центар Жупа е особено специфична за ЈУГОЗАПАДНИОТ плански регион, бидејќи тука живее доминантно турско население, и од тој агол претставува интересна дестинација за обичните посетители и потенцијалните инвеститори од Турција, како и при посетите на, официјални- високи - личности и делегации, од оваа земја, кои често пати престојуваат во РМ, и пројавуваат интерес да ги посетат и овие населени места. Ц. Жупа е атрактивна, пред сè, заради, спомен- куќата на (големиот турски државник) Мустафа Ќемал Ататурк, чие потекло е токму од овој крај, како и од аспект на профаната архитектура која плени со својата автентичност. Нема многу места во Македонија каде се зачувани архитектонски целини од Османлискиот период, и од тиe причини во проектот се предвидени зафати за подобрување на патната мрежа на споменатата општина. Во Центар Жупа сообраќајницата e во населеното место Житинени, и тука е предвидено да се изврши целосна рехабилитација на патот во должина од 1,4 км, преку зафати за тампонирање на одредени земјени краци, гребење на оштетениот асфалт и постилање на нов, како и нејзино осовременување преку поставување на рабници. Македонски Брод е значајна туристичка дестинација од спелеолошки аспект за Регионот, но и за цела Македонија, бидејќи на оваа територијата се наоѓаат најзначајните и најпосетуваните пештери (како што се Пешна и Слатински извор, и над 20-тина други) во државата, кои по своето значење ги надминуваат нашите -локални - граници, и од таа призма општината е, особено, податлива за развој на овие селективни форми на туристички активности. За жал во М.Брод реализирани се многу малку инвестиции со цел подобрување на општите состојби во патната инфраструктура. Во таа насока со проектот ќе се преземат активности за рехабилитација на сообраќајницата Димитар Влахов, која има значајна улога во подобрување на локалната инфраструктура во М.Брод, интересна од аспект на посетителите на овој град. Со повеќето проектни активности оваа сообраќајница ќе биде целосно рехабилитирана (со поставување одводни и дренажни цевки, шахти и тампонирање), асфалтирана и современо уредена со поставување на рабници.