ПРОЕКТ ДЕТАЛИ

Патниот транспорт и инфраструктура во Југоисточниот плански регион играат клучна улога во економскиот развој, зголемувањето на бројот на туристите во регионот, подобрување на комуникацијата меѓу граѓаните од околните населени места, пристапот на земјоделците до своите ниви и до пазарите на големо и развивање на современа и функционална инфраструктура, како и на животниот стандард на населението во целост. Регионалните патишта обезбедуваат пристап до главните патни коридори и магистралната патна мрежа и заедно со локалните патишта се од големо значење за развојот на локалната економија, привлекувањето на нови инвестиции, мали бизниси и земјоделски активности низ земјата. Патната инфраструктура е добро развиена во Југоисточниот регион, иако постојат услови за нејзино подобрување. Должината и квалитетот на локалната патна инфраструктура се задоволителни и не се под европските стандарди. Трендот на зголемување на должината на асфалтните патишта е позитивен. Сепак потребни се нови локални патишта и подобрување на постоечките патни правци, особено помеѓу населените места во општините и помеѓу општините. Токму преку овој проект „Ревитализација на патот Богородица - Стојаково, крстосница со регионалниот пат Гевгелија - Богданци 2-ра фаза“ е предвидено обновување на патниот правец Богородица – Стојаково 2-ра фаза. Првата фаза го опфаќа патот Богородица - Стојаково, крстосница со регионалниот пат Гевгелија – Богданци кај бензинска пумпа Шимов во должина од 4,5 км и за негова ревитализација т.е. поставување на нов слој на асфалт е поднесено барање за користење на финансиски средства од Програмата за финансиска поддршка на руралниот развој за 2018 година преку Агенцијата за финансиска поддршка во земјоделството и руралниот развој. Населеното место Богородица се наоѓа во најјужниот дел од Република Македонија, на самата граница со Република Грција, а е во состав на о. Гевгелија која е со надморска височина од 64 m и простор од 485 km2. Во општината живеат 22.988 жители, од кои околу 15.685 жители во општинскиот центар Гевгелија, а останите во населените места. Низ територијата на општина Гевгелија минува примарната оска на развојот која се протега по Вардарската долина во правец север – југ и претставува дел од коридорот 10. Мошне важна е пограничната позиција на општина Гевгелија со Република Грција, како можност за лоцирање на стопански капацитети, кои бараат голем транспорт на суровини и готови производи, при што близината на Солунското пристаниште претставува значајна компаративна предност. Патот Богородица - Стојаково, крстосница со регионалниот пат Гевгелија – Богданци, претставува патна врска помеѓу општините Гевгелија и Богданци, односно помеѓу населените места Богородица и Стојаково. Бидејќи патот е асфалтиран пред 40 години отежната е комуникацијата на населението од овие две населени места. Поради временските прилики и интензивното користење овој патен правец се наоѓа во многу лоша состојба и ваквата состојба ја наметна потребата од негово обновување односно ревитализација. Исто така бидејќи станува збор за населени места кадешто претежна дејност е земјоделството користењето на овој пат предизвикува проблеми кај земјоделците и тоа зголемен трошок за транспорт и загуби поради намалување на квалитетот на земјоделските производи. Како резултат на медитеранската клима, земјоделието и производството на храна отсекогаш имале важност за добриот стандард и стопанскиот развој на општината, како и за целиот Југоисточен регион. Овде, се одгледува широк спектар на овошје и зеленчук, вклучувајќи производи кои се карактеристични за медитеранското поднебје, како што се смокви, маслинки, калинки, грозје, киви и други. Под пластеници, покрај ранградинарските производи се одгледуваат и различни видови на цвеќиња. Земјоделското земјиште зафаќа површина од 7.800 ha, од кои 3.260 ha се користат како ораници и бавчи, 1000 ha се засадени со лозови насади, 170 ha со јаболка, 100 ha се останати овошни насади, 300 ha се ливади, 2652 ha се пасишта, 28350 ha се под шума, простанатите се неплодно земјиште. Околу 4/5 од обработливото земјиште e кај индивидуалните земјоделци, 1/5 кај правните лица. Со изградбата на овој локален патен правец ќе се подобри комуникацијата меѓу граѓаните од населените места Богородица и Стојаково, кои заедно имаат околу 830 домаќинства или околу 3000 жители и ќе се овозможи побезбеден транспорт на патници и стока. Земјоделските производители пак ќе имаат можност да ги намалат транспортните трошоци на земјоделските производи и да го подобрат квалитетот на производите бидејќи благопријатните климатски услови кои ги има во целокупниот дел на котлината, се добри потенцијали за квалитетна храна и еко производи. Преку ревитализацијата на овој патен правец ќе се овозможи свежиот зеленчук полесно да се пренесува до македонските пазари, но и да се извезува и надвор од земјата. Ревитализацијата на овој патен правец во должина од 2100 метри и ширина од 5,5 метри се состои од отстранување на стариот асфалт од патот и негово одведување, чистење и премачкување со емулзија, поставување на израмнителен слој и поставување на нов асфалт. Подетално активностите се опишани во предмер пресметката која е составен дел на оваа апликација. Изградбата на патниот правец с. Богородица - с. Стојаково води кон подобрување на патната инфраструктура во регионот и подобрување на условите за живот и работа на граѓаните со што се овозможува поголем економски развој на целиот Југоисточен регион.