ПРОЕКТ ДЕТАЛИ

Југоисточниот плански регион се протега на крајниот југоисточен дел на Република Македонија, на јужниот дел граничи со Република Грција, на исток со Република Бугарија, а на север и запад со Источниот и Вардарскиот плански регион. За да ја оствари својата визија, односно да биде поскувана дестинација со препознатливи особености, Југоисточниот плански регион постојано се стреми кон креирање на конкурентски предности, препознатливи македонски производи, поттикнување на развојот на извозно ориентираните индустрии, поттикнување на развојот постоечките туристички потенцијали и развивање на нови. Според своите карактеристики и положба, во рамките на регионот идентификувани се доста природни и историски убавини кои нудат најразличен вид на туризам и се посетувани од домашни и странски туристи. Југоисточниот регион се стреми кон одржување на своите туристички потенцијали преку искористување на можностите на регионот како и преку одржување на рамнотежа помеѓу економските и севкупните општествени потреби на регионот. Во Југоисточниот плански регион има 3 вештачки Езера, а едно од нив се наоѓа во општина Конче. Општина Конче е рурална општина во Југоисточна Македонија. Општината е дел од Радовишкиот регион, а статистички е дел од Југоисточниот плански регион. Според природните карактеристики, Езерото Мантово се смета за туристички локалитет со голем потенцијал на подрачјето на Југоисточниот плански регион, односно Езерото и неговата околина е туристички ресурс врз кој општината и Југоистокот планираат да го развиваат туризмот. Езерото се наоѓа на оддалеченост од 15 км од Конче, 18 км од Радовиш и 25 км од Штип, со што го прави атрактивно за посетители од пошироката околина како од Југоисточнит регион така и од соседните региони со кои граничи. По капацитет тоа е втора акумулација во источниот дел на Република Македонија. Иако целосно се наоѓа во општината Конче, езерото е градено со цел да ги задоволи потребите и на соседните општини. Оваа област е веќе утврдена како главен туристички центар со постоечки урбанистички план кој треба да се развива, наречен „Сончева Езерска населба Мантово“. Во поглед на туризмот, Езерото и неговата околина, најпрво што може да го понудат е чистиот воздух, чистата вода, прекрасниот пејсаж, мирот и тишината со која е опкружено ова прекрасно место. Езерото има своја пријатна микроклима, така што температурата на водата во летните месеци достигнува 24 степени што го прави погодно во летниот период за капење и за различни видови на водни спортови. Во моментот, во близина на Езерото се планираат повеќе атракции со цел поттикнување на туристичката понуда. Првите чекори се направени од страна на општина Конче со изградбата на „Влашките Колиби“, во рамките на проектот ,,Културното наследство на власите во регионите на Конче и Серес“, од програмата за прекугранична соработка меѓу Р.Македонија и Р.Грција. Исто така, од страна на општината, во тек е и уште еден проект за изградба на туристичка населба со индивидуални кукички за одмор, хотел, трим-патеки и спортски терени на Езерото. Секоја година Езерото го посетуваат риболовци од околните општини бидејќи изобилува со богат и разновиден биодиверзитет, со најразлични видови на слатководни риби и птици. Најзастапени риби се: крап, сом, клен, караш и костреш, па затоа е честа дестинација на љубителите на спортскиот риболов. На самиот брег од езерото се наоѓа и манастир. Исто така, во непосредна близина се наоѓа и познатиот рид Габровска Чука, кој е неиспитан археолошки локалитет. Во близина на истиот рид, особено е интересен и делот на скоро вертикалните гранитни карпи со висина од 2 до 25 метри. Овие карпи се со јужна експозиција и овозможуваат добри услови за алпинистичко искачување и веќе се посетуваат од љубителите на овој адреналински спорт од локалниот алпинистички клуб Плоча од Радовиш. Целата поширока околина на Езерото е опкружена со шуми и ливади така што, доколку се уредат пешачки патеки, ќе можат да бидат искористени од вљубениците во пешачењето, а доколку се уредат и велосипедски патеки тогаш ќе можат да се искористат за планински велосипедизам. Потенцијалот на регионот е основата, но не е доволен за привлекување на домашни и странски туристи и инвестиции во регионот. За реализација на мерки за развој на туризмот потребно е постојано инвестирање во постоечката туристичката понуда која ја има во регионот или пак збогатување со нова понуда, зајкнување на човечките ресурси и подобрување на патната инфраструктура. Сите овие фактори се значајни и придонесуваат кон развојот на туризмот, но во случај на нивно отсуство се јавува попреченост во развојот на одредени туристички области кои се потенцијал не само за развојот на туризмот туку и за привлекување на инвестиции со коишто ќе се подобри економскиот развој во регионот. Фактот што Езерото сѐ уште ги нема искористено своите туристички потенцијали, укажува на тоа дека туризмот не може да се развива спонтано. Постојат повеќе причини за таквата состојба, како што е немање добар пристапен пат, редовна сообраќајна линија, туристичка инфраструктура, изградени сместувачко-угостителски објекти, продавници за основни артикли, туристички маркетинг и друго. Од овие причини Езерото е посетувано само од еднодневни или викенд-туристи со шатори, како и од сопствениците на викендиците околу Езерото. Во моментот, оваа туристичка населба се соочува со пречки при развојот поради отсуство на факторот кој не само што го забавува развојот на туризмот туку и влијае врз економскиот развој. Поради несоодветноста на пристапноста до оваа населба, во овој момент, ограничени се инвестициите во инфраструктурата на објекти за сместување и рекреација, додека во исто време самото население нема доволно мотивација за издавање на соби или започнување на било каков друг бизнис поврзан со туризмот. Мантово, како туристичка локација во Југоисточниот плански регион не ги задоволува потребите и очекувањата на посетителите во однос на посета на локации со природна убавина околу Езерото. За надминување на овој недостаток, се предлага реализација на овој предлог проект кој ќе придонесе кон подобрување на условите за пристапноста на населението и туристите до Сончевата Езерска населба, зголемување на атрактивноста на Езерото, задржување на населението во родното место, мотивација за започнување на бизнис, зголемување на инвестициите, а со тоа и зголемување на бројот на туристите и економските активности како на општинско така и на регионално ниво. Со овој предлог проект се предвидува подобрување на патната инфраструктура односно изградба на следните улици кои водат до Сончевата Езерска населба Мантово и тоа: - ул бр.8 со ширина од 3 метри асфалт, на дел 1 со должина од околу 40 метри и на дел 2 со должина од околу 45 метри. Двата дела на оваа улица поминуваат покрај парцели за градење на викенд куќи и се спуштаат кон Езерото Мантово; - ул.бр.3 со ширина од 6 метри асфалт и 2x0.5 м банкини од страните. Оваа улица се поврзува со ул.8 и ул.2, поврзува повеќе градежни парцели за викенд куќи и истата поминува покрај парцелата планирана за автокамп; - ул.бр.2 со ширина од 6 метри асфалт и 2x0.5 м банкини од страните. Оваа улица продолжува со ул.3 и поврзува повеќе градежни парцели за викенд куќи и истата започнува од локалниот пат Брана Мантово- с. Габревци и продолжува кон Езерото Мантово. Согласно моменталната состојба на локацијата каде што се планира изградба на улиците бр. 8 и бр. 3 е земјоделско земјиште. Површината е покриена со хумусен материјал со висина H=20cm, којшто е потребно да се отстрани пред да се почне со изградба на трупот на улиците. На оваа улица предвидено е изведба на на атмосферска канализација и пат кои ѓе се извршуваат истовремено во зависност од можностите.Моменталната состојба на локацијата каде што се планира проширување на улицата бр.2 е ридест терен. На оваа улица се планираат да се вршат претходни работи како, рушење на постоечки објекти и огради. На вака пригответниот терен потоа ќе се извршуваат земјени работи, ископ на земјен материјал, подготовка на подтло, рушење на постоечки асфалт, вградување на тампон и вградување на асфлат или бехатон плочки, согласно проектната документација. Предлог локацијата се наоѓа северно од вештачката акомулација Мантово, на неговиот крајбрежен дел, К.О. „Долна Врштица“, општина Конче. Местоположбата на локалитетот е со високи туристичко-комерцијални и урбанистички квалитети. Просторот е со многу актрактивен и погоден терен, површината на како урбана целина изнесува 24,87ха. Парцелите во локалитетот се во мешовита сопственост, дел се во приватна сопственост, а дел во државна што овозможува привлекување на значајни и атрактивни инвеститори. За целиот комплекс предвидена е улучна мрежа преку која ќе се овозможи директно стигнување до секоја градежна парцела. Локалитетот е условен за изградба на викенд куќи, хотелски комплекс, спортско рекреативен центар, сместувачки капацитети и останати деловни дејности. Со својот простор е атрактивен за инвестирање на значајни развојни програми на Владата на Р.Македонија. Со подобрување на оваа патна инфраструктура развојот на селото и селските подрачја во идниот период ќе се овозможи целосно активирање на потенцијалните релевантни за развојот на стопанството, подобрување на животните и работни услови и трајно мотивирање на населението за опстанок во матичната средина, ќе се подобри пристапноста на локалните туристи од околните општини која секоја година доаѓаат на риболов како и на другите туристи кои ги посетуваат изградените атракции во населбата. Предлог проектот го таргетира Езерото Мантово, односно надминување на ограниченоста за пристап и достапност до автентични природни убавини и активности кои се драгоцен ресурс во Југоисточниот плански регион, а кои не се доволно експонирани во рамки на дестинацијата.