ПРОЕКТ ДЕТАЛИ

Културата е фактор кој го поттикнува развојот на цивилизацијата и ја зголемува општествената кохезија. Денешните услови на живот, напоредно со развојот на новите технологии, вредносни ориентации и глобализацијата, на културата ѝ даваат карактеристики на исклучително развојна сфера. Таа е подрачје од кое извираат творечки односи и предизвици релевантни за вкупниот современ развој. Неспорен е фактот дека културата е духовна храна, во која што се вложени многу знаења, таленти и напори со цел да продолжат да се негуваат темелите кои што се поставени од страна на голем број дејци од овчеполската котлина во изминатите неколку децени и кои имаат посебен удел во изградбата на една културна институција наречена Дом на култура, бидејќи без нив, истиот ќе беше уште една зграда без културно-уметнички дух и инспирација. ОУ Дом на културата „Крсте Мисирков“ е општинска установа која е центар на сите активности и настани од културен карактер во општината и како институција е надлежна за презентација и промоција на локалното етнолошко културно наследство во земјата и во странство, поттикнување и развој на културата, особено кај децата и младите, културно – уметничкиот аматеризам и објавување на културно – уметнички дела. ОУ Дом на културата „Крсте Мисирков“ својата програма за работа ја изготвува врз основа на Законот за култура, Статутот на установата, потребите на граѓаните, анализа на претходно реализираните програмски содржини, следење на современите текови на културни настани, сė со цел обединување на локалната заедница околу културните настани, како и подигнување на културното живеење и културните вредности во општината и пошироко. На својата расположлива површина од 4000м2 Домот на култура располага со 2 сцени - поголемата со површина од 378м2 и мала сцена со 20м2. Од двете сали со кои располага Домот, големата сала брои 420 седишта, а малата сала има 120 седишта, 2 читални. Програмата за работа се реализира преку работа на матичните дејности кои работат во состав на Домот и тоа: Сценско-уметничка дејност, Музичка дејност, Библиотечна дејност, Драмска дејност, Литературна дејност, Ликовна дејност, Филмска и киноприкажувачка дејност, Издавачка дејност. Преку нивната работа и активности се остварува основната функција на Домот. Матичните дејности во Домот на културата, преку веќе афирмираните матични дејности како што се: Фолклорниот ансамбал „Јанко Глигоров“, пејачки групи (Женско вокално трио „Ѕуница“, Женска пејачка група „Камелија“), изучување свирење на народни инструменти и сл., драмско студио, литературен клуб, разни манифестации - бележат успешно промовирање и презентирање како на сцената во културните институции од земјата, така и на меѓународно поле, чија најверодостојна потврда се многубројните награди и признанија. На културната мапа во регионот и пошироко, овој Дом на Култура е препознатлив и по манифестации и фестивали кои ги организира меѓу кои се и: Меѓународен фестивал на изворен фолклор „Тодорица“, Свечена Академија – по повод Свети Никола, Шоу за деца „Ѕвездички“,во месецот на книгата манифестацијата „Книгата отворен прозорец кон светот“, Поетска манифестација „Пролет, љубов, смеа“, Саем на книгата, Светиниколско културно лето –Есенски културен бран, итн. Мора да се напомене дека, во последнава деценија, Домот на културата е домаќин на голем број интернационални гостувања на фолклорни друштва, ансамбли, како и културно-уметнички организации од Србија, Хрватска, Турција, Украина и Русија. Но за жал, со последната реконструкција на Домот на културата во 2011/2012 година, не беше опфатено решавањето на проблемот со затоплување и климатизација на кино салата во која се реализираат најголемиот дел од програмските активности во Домот (филмски проекции, театарски претстави, концерти на фолклорни ансабли, проби на ФА „Јанко Глигоров“ итн.). Ова доведува до намалување на условите за непречено извршување на културните дејности како и неможност за задоволување на потребите од културен аспект. Дополнителна причина за поставување на систем за греење и климатизација во кино салата е и фактот дека во случаевите на екстремни временски услови, особено во зимскиот и летниот период, температурата може да достигне и до 40 степени Целзиусови, но и да се намали во минусни температури. Во овие случаеви, на вработените во Домот како и на посетителите им се одзема правото за работење и уживање во културно-уметничките дејности, кое што резултира со незадоволство и револт. Досегашниот модел на греење во кино салата и помошните простории во Домот на културата се одвивал со помош на вклучување на електрични грејни тела (греалки и тајфуни, од кои дел не се функционално исправни) и придонесуваат кон екстремно висока потрошувачка на електрична енергија а со тоа, придонесуваат кон огромно финансиско оштетување на Домот на културата. Но, проблемот не е само во потрошувачката на енергија и финансиското трошење. Проблемот е што овој старомоден начин на греење не дава долгорочни резултати. На пример, при самото влегување/излегување на посетителите од кино салата и помошните простории, дотогаш акумулираната топлина исчезнува и просториите повторно се студени и недоволно загреани и посетителите, за жал, мораат да ја проследат културната манифестација во такви „нехумани“ услови. За таа цел, повеќе од неопходно е да се инсталира системот за греење и климатизација на кино салата и помошните простории, бидејќи на тој начин, не само младите во општина Свети Николе, туку целата популација од општината па и пошироко од регионот ќе се здобие со подобрени услови за посетување на културно-уметничките активности кое што ќе придонесе кон збогатување на културниот дух и дополнително ќе промовира поттикнување на разновидни специфични форми на творештво.