ПРОЕКТ ДЕТАЛИ

Патната делница од с. Пашино Рувци до регионалниот пат Р 2339 има вкупна должина од 1.315,26 м и за жителите на општина Кривогаштани претставува директно поврзување со 4 Пелагониски општини преку населените места Лагово (Прилеп) – Воѓани (Кривогаштани) – Бучин (Крушево) и градот Демир Хисар. Во моментот, патот има земјан коловоз со големи деформации така што движењето на граѓаните и одвивањето на сообраќајот се одвива со големи тешкотии. Во текот на 2018 година, со проект одобрен од Програмата за регионален развој на РCМ, беше реконструирана една фаза од патот во должина од 450 метри. Оваа апликација ја опфаќа 2 фаза во должина од 452 метри. Овој патен правец има големо значење за жителите на општина Кривогаштани и поширокиот регион бидејќи претставува врска на жителите од село Пашино Рувци и околните населени места од Кривогаштани со регионалниот пат кој го поврзува Прилеп со Крушево односно Демир Хисар. Со реконструкцијата на овој патен правец ќе се скрати патот на жителите кои патуваат преку локалниот пат Чепигово - Пашино Рувци до Прилеп за околу 2,5 км а ќе се подобри и поврзаноста на жителите од населените места кои гравитираат околу општината Кривогаштани со соседните општини Прилеп, Крушево и Демир Хисар. Дополнително, со проектот ќе се овозможи и поефикасен проток на стоките и услугите кои се нудат на регионалниот сточен и регионалниот зелен пазар во Кривогаштани, целосно реконструирани со средства од Програмата за регионален развој. Исто така жителите кои доаѓаат преку регионалниот пат Р 2339 од населените места Кадино Село, Галичани, Лагово и останати од општина Прилеп и одат кон Чепигово, Тројкрсти, Тополчани до магистралниот пат Прилеп - Битола можат да го користат овој скратен пат и да ја избегнат фреквенцијата на постоечкиот регионален пат. Бидејќи патот е една од најглавните патни артерии која води до земјоделските површини во северниот дел на Пелагонија, истиот има огромно значење за развојот на индивидуалните земјоделци и земјоделските стопанства во регионот.