ПРОЕКТ ДЕТАЛИ

Локалните патишта се од големо значење за развојот на регионалните плански региони, локалната економија, привлекувањето на нови инвестиции, мали бизниси и земјоделски активности. За таа цел потребно е во Југоисточниот плански регион да се создадат неопходни услови за развој, уредување и изградба на локални патишта кои ќе го подобрат животниот стандард и ќе ја олеснат комуникацијата на населението и со тоа би се зголемил економскиот развој. Постоечката состојба на локалниот пат од населено место Бориево во општина Босилово до населеното место Колешино во општина Ново Село е во многу лоша состојба и предизвикува низа проблеми за земјоделците и тоа зголемени трошоци, загуби поради намалување на квалитетот и други проблеми. Овој пат е врска на земјоделците до главниот дистрибутивен центар во с. Колешино и до нивното обработливо земјиште во областа. Од друга страна туристите кои доаѓаат во посета на туристичките локалитети до кои се доаѓа преку овој пат се соочуваат со несоодветна патна инфраструктура, нелагодност при патувањето и одложено време за пристигнување до посакуваната дестинација. Комуникацијата на жителите од двете села Бориево и Колешино, а особено на пензионерите и лицата со посебни потреби е отежната, поради тоа што овие две села се поврзани со пат кој е земјен, тесен и е во многу лоша состојба. Локалниот пат започнува од населеното место Бориево до населеното место Колешино и истиот е во должина од 6410м. Врз основа на веќе изготвениот основен проект за локален пат с.Бориево општина Босилово и с.Колешино општина Ново Село, проектот изградба на мостот Бориево-Колешино во должина од 30м и ширина 6м е веќе завршен со финансиска поддршка од Бирото за регионален развој, а со овој проект ќе се работи на земјени работи и асфалтирање во изградбата на дел од локален пат с.Бориево – с.Колешино - прва фаза која ќе опфаќа изградба на локален пат во должина 2200м. Моменталната состојба на овој локален пат не е урбанистички соодветна за нормално одвивање на сообраќајот при што постојниот земјен пат е во многу лоша состојба и е тешко проодлив за моторни возила особено по врнежи на дожд и снег, со тоа што патниот правец со уредување и изградба на истиот ќе се овозможи сообраќајот да се одвива нормално без пречки со што би се олеснила и комуникацијата на населението кое живее во оваа населено место, а исто така со тоа ќе се реши и проблемот со недоволната поврзаност на земјоделското земјиште и ќе се овозможи создавање на безбеден и ефикасен систем на движење на луѓе и стока. Овој локален патен правец е особено важен и за посетителите на Колешинските Водопади и Моноспитовското Блато со што им создава потешкотии при патувањето до овие туристички локалитети по најразлични временски услови и го продолжува времето на патување. Користењето на овој патен правец исто така предизвикува проблеми за трговците и земјоделците и тоа зголемени трошоци за транспорт и загуби поради намалување на квантитетот на трговските и земјоделските производи. Современиот пристап до туристичките локалитети со сигурност создава услови за поинтензивен развој на туризмот во регионот. Најпознати туристички локалитети во овој дел се Габровските, Колешинските и Смоларскиот водопад, понатаму локалитетот Пирго, Мокринските Извори, Моноспитовско Блато и Бања Банско. Со подобрување на патната инфраструктура се овозможува побрз и полесен пристап до овие локалитети и за домашните и за странски туристи. Како генерален заклучок може да се констатира дека состојбата на овој патен правец во регионот според должината е на многу пониско ниво во однос на другите региони. Поради тоа е неопходно уредување на истиот, така што со изградба на патниот правец с. Бориево - с. Колешино ќе се подобри комуникацијата меѓу граѓаните од околните населени места, ќе има подобрување на транспортот на земјоделските производи до дистрибутивните центри и до пазарите надвор од земјата, ќе се растерети движењето на луѓе и стока на единствената врска која се движи од Банско-Муртино-Робово-магистрален пат А4, ќе се олесни комникацијата помеѓу подбеласичкиот регион со долината на струмичката котлина и ќе се овозможи и развој на туризмот со лесен пристап до туристичките локалитети во регионот. Со развојот на локалната патна мрежа на индиректен начин се придонесува кон подобрување на конкуретноста на земјоделието во Југоисточниот плански регион. Трите општини партнери во овој проект, како и целиот Југоисточен плански регион е претежно земјоделски и основна дејност на руралното население е токму земјоделието. Во с.Колешино се наоѓа Откупен Центар на земјоделски производи каде луѓето од овие краеви ги продаваат своите производи. Поради ова изградбата на ваквиот локален патен правец допринесува за побрз и полесен транспорт на производите, подобрување на понудата на пазарот и зголемување на конкурентноста на целиот регион.