ПРОЕКТ ДЕТАЛИ

Патниот транспорт и инфраструктура во Југоисточниот плански регион играат клучна улога во економскиот развој, зголемувањето на бројот на туристите во регионот, подобрување на комуникацијата меѓу граѓаните од околните населени места, пристапот на земјоделците до своите ниви и до пазарите на големо и развивање на современа и функционална инфраструктура, како и на животниот стандард на населението во целост. Регионалните патишта обезбедуваат пристап до главните патни коридори и магистралната патна мрежа и заедно со локалните патишта се од големо значење за развојот на локалната економија, привлекувањето на нови инвестиции, мали бизниси и земјоделски активности низ земјата. Патната инфраструктура е добро развиена во Југоисточниот регион, иако постојат услови за нејзино подобрување. Должината и квалитетот на локалната патна инфраструктура се задоволителни и не се под европските стандарди. Трендот на зголемување на должината на асфалтните патишта е позитивен. Сепак потребнo e осовременување на постоечката и изградба на нова патна инфраструктура, особено помеѓу населените места во општините и помеѓу општините. Токму овој проект предвидува осовременување и обновување на патната инфраструктура помеѓу населените места с. Просениково, о. Струмица и с. Сарај, о. Босилово преку изградба на мост на река Турија на овој патен правец. Селото Просениково се наоѓа во општина Струмица и о од градот е оддалечен 4 километри. Надморската височина во селото е 226 метри, а површината на селото изнесува 507 ha. Селото се граничи со селата Добрејци, Пиперово, Дабиле, Чанаклија и Сарај. Додека пак селото Сарај се наоѓа во западниот дел на општина Босилово. Десно од селото поминува реката Струмица, а на само два километри поминува патот Струмица-Берово. Надморската височина во селото е 230 метри, додека селото зафаќа површина од 36 км2. Од нив, 3251 хектари се обработливо земјоделско земјиште. Патниот правец с.Просениково — с.Сарај е во рамничарски предел и поминува преку река Турија. Во моментот комуникацијата помеѓу овие две села се одвива преку привремено решение – мост (цевасти пропусти) кој не ги задоволува ниту сообраќајните ниту безбедносните критериуми, бидејќи мостот кој претходно бил изграден е однесен од поплавата во 2013 година. Со надоаѓање на поголеми атмосферски води претходно споменатиот пропуст може да биде целосно уништен и ќе настане прекин во сообраќајната комуникација помеѓу општина Струмица, општина Босилово и општина Василево. Бидејќи голем дел од населението во овој крај се занимаваат со земјоделие отежнат е пристапот на земјоделците до нивните посеви, а исто така и до откупните центри. Овој проект предвидува изградба на модерен инфраструктурен објект – мост со ширина од 6 метри коловозна конструкција и 2 x 1,0 метар тротоарна површина наменета за пешачки сообраќај. Должината на мостот ќе изнесува 24,6 метри, а вкупната должина заедно со пристапните патишта од двете страни на мостот ќе изнесува 215 метри. Предвидено е мостот да биде за 3 метри повисок од претходниот, со што би се спречило истиот да биде повторно однесен доколку се зголеми нивото на реката Турија при обилни врнежи од дожд. Со изградбата на овој мост ќе се подобри сообраќајната комуникација меѓу граѓаните од населените места Просениково и Сарај, кои заедно имаат околу 625 домаќинства или околу 2500 жители и ќе се овозможи побезбеден транспорт на патници и стока. Мостот ќе овозможи да се намали времето на патување на жителите од општина Василево преку општина Босилово кон општина Ново Село, односно регионалниот пат кон границата со Р. Бугарија. Бидејќи самиот објект се наоѓа на крстосницата помеѓу трите општини, кои се големи производители на раноградинарски и други земјоделски култури ќе се овозможи на самите земјоделски производители побрзо и побезбедно да стигнат до своите ниви, како и до откупните центри во регионот. Ќе се овозможи да ги намалат транспортните трошоци на земјоделските производи и да го подобрат квалитетот на производите. Изградбата на мостот на река Турија помеѓу селата Просениково и Сарај ќе овозможи обновување и осовременување на патната инфраструктура во Југоисточниот плански регион и подобрување на условите за живот на сите граѓани во регионот, а ќе се овозможи и поголем економски развој на самиот регион.