ПРОЕКТ ДЕТАЛИ

Покрај изворите на територијата во Пелагонискиот регион (општина Демир Хисар), Црна Река тече низ 5 други општини: Новаци Битола, Могила, Кривогаштани и Прилеп, кои сочинуваат повеќе од 75% од територијата на Пелагонискиот регион. Црна Река заедно со своите притоки, не само поради водениот потенцијал туку и поради непосредната близина до земјоделските површини претставува најголемиот воден ресурс од кој се наводнува целиот јужен дел на Пелагониската котлина. Вкупниот број на притоки на Црна Река е повеќе од 20, а оние најзначајните со должина поголема од 10 км се: Шемница, Боишка Река, Стара Река, Драгор, Краешка Река, Вир, Лажечка Река, Елешка Река, Коњарска Река, Трновчица, Градешка Река, Бутурица, Блашица, Каменица, Жаба, Журешница, Блато, Крушеичка Река, Дуњска Река и Раец. Водостојот на Црна Река односно регулацијата и уредувањето на коритото на нејзиниот слив и нејзините притоки, претставуваат незаменлив чинител во земјоделската пракса но и константна закана за животната средина и правилната обработка на земјата. Вдолж текот на Црна Река, утврдени се повеќе критични точки на кои редовно има излевање на водата од реката и поплава на плодно земјоделско земјиште. Штетите се неколкукратни: на краток рок директно се уништуваат засеани земјоделски површини но уште полошо, на долг рок се врши девастација на земјоделското земјиште и тоа станува неподобно за обработка и мелиорација. Излевањето на водата на реката директно го намалува нејзиниот квалитет и по нејзиното враќање во нормалното корито, почвата останува позагадена. Загаденоста на почвата бара нејзино понатамошно третирање (пред идна обработка) што преку подземните води дополнително враќа штетни материи во надземниот водотек на Црна Река заедно со нејзините притоки. Низ централниот дел на с.Гермијан поминува поројот наречен Јардерскии порој и истиот селото го дели на два дела. Бидејки поројот е со голема сливна површина која не е пошумена за време на поројни дождови доаѓа до поплавување на куќите и на обработливите земјоделски површини во атарот на с.Гермијан. Поради големите наноси на земја кои ги носат поројните води доага до посипување на речното корито на река Елешка, каде се влива поројот и истите тие води и наноси од земја се вливаат во реката Црна со што доага до намалување на притокот во Црна река што предизвикува поплави во цело Пелагониско поле во атарите на општините Новаци, Битола и Могила. Црна Река претставува најголем водотек во Пелагонискиот регион. Ако се изземе Преспанското езеро (кое е природна акумулација) реката претставува најголемиот хидропотенцијал и воден ресурс на регионот. Целиот тек на реката изнесува 207 километри а во зависност од геолокацијата, истиот може да има карактеристики на брза планиска река или на заезерена котлинска река. Вкупната површина на сливот на реката изнесува скоро 6.000 километри квадратни. Реката Шемница е најзначајната притока на Црна Река во јужниот дел на Пелагонија. На неа е изградено Стрежевско езеро, кое наводнува плодни земјоделски површини и обезбедува техничка вода за РЕК Битола. Во долниот дел на нејзиниот тек, Шемница ја наводнува и плодната почва на полето помеѓу Битола, Новаци и Могила.