ПРОЕКТ ДЕТАЛИ

Градскиот пазар во Ресен е изграден околу 1960 година во центарот на градот и има тезги со должина од 184 метри. Моментално со него управува Јавното комунално претпријатие „Пролетер“ – Ресен во кое се вработени вкупно 88 лица, од кои 3 се редовно ангажирани за градскиот пазар, а повремено и повеќе персонал работи на пазарот (после пазарниот ден за чистење, миење, одведување на отпадот и слично). Пазарот веќе одамна работи со потешкотии и проблеми. Приемот на прехранбени производи се врши преку улица „Илинденска“ којашто е тесна и без можност за разминување на возила, без паркинг простор за продавачите. Сместувањето и чувањето на ризичните прехранбени производи (сурова храна, свежа храна или преработки) се вршат во недоволно хигиенски и тешки услови, бидејќи пазарната површина е несоодветно покриена со импровизирана конструкција од плексиглас и оштетени чадори, што за време на големи врнежи од снег нема доволна механичка отпорност и стабилност и претставува опасност за луѓето, а на места е непокриена и без придружни објекти за сместување и чување на прехранбените производи, па тие производи се незаштитени од прашина, од директни сончеви радијации и влегување на животни – скитници. За да се избегне негативното влијание на амбиенталната температура поголема од 25°С и релативна влажност на воздухот помала од 60% или поголема од 80% за чување, манипулација и изложување на високоризичните прехранбени производи, потребно е да се обезбеди просторија со кондизионирани услови. Делот со бараки на К.П. 3840, К.О. Ресен на некои делови е запуштен и руиниран. Нема изградено соодветна инфраструктура – хигиенски санитарни јазли со достапна топла вода за одржување на личната хигиена и за перење и освежување на зеленчукот и овошјето во текот на летните месеци. Питка вода е обезбедена само преку една јавна чешма. Атмосферска канализација не е изведена и често доаѓа до насобирање на вода при врнежи и при чистење. Со овој проект ќе се изврши изградба на покривна конструкција, санација на подната површина со индустриски под, изведба на атмосферска канализациона мрежа со сливници и решетки, изградба на затворени простории (за продажба на млечни и месни производи според HACCP системот, административен простор и санитарен јазол), со што регионалниот пазар во Ресен ќе добие подобрени услови за работа согласно пропишаните закони.