ПРОЕКТ ДЕТАЛИ

Општина Градско е средина во која егзистираат претставници од разни етнички заедници. Според пописот од 2002 година, Општина Градско брои 3760 жители, од кои: Македонци 2924 (77,77%), Албанци 125 (3,32%), Турци 71 (1,89%), Роми 127 (3,38%), Срби 23 (0,61%), Бошњаци 465 (12,37%) и останати 25 (0,66%). Етничката разноликост е една од карактеристиките кои ја дефинираат општина Градско и затоа е потребно да се направат сериозни обиди за да се приближат заедниците, да се воспостави еднаквост, социјална инклузија и кохезија. Одржувањето на стабилни меѓуетнички односи е неопходен предуслов за стабилноста и развој на општината. Во моментов во општина Градско има објективни разлики кои водат кон поделба на етничките заедници, како на пример, разликите во квалитетот на живот. Населените места каде што живеат не-мнозинските заедници не се подеднакво развиени како и централното општинско подрачје. Општина Градско со својата централна географска положба е општина во која поминуваат сите поважни транспортни и комуникациски правци. Но истите се во многу лоша состојба. Коловозната конструкција на локалните патни правци е доста оштетена и квалитетот на транспортните услуги е доста низок. Селата се во уште покатастрофална состојба што го ограничува нивниот развој. Во ситуација кога патниот транспорт и е единствениот вид на транспорт во поголемиот дел од општината, значењето кое го има патната инфраструктура за овозможување на одржливиот развој екратно се зголемува. Со развојот на и подобрување на патната мрежа на индиректен начин се придонесува кон подобрување на конкурентноста на економијата. Квалитетна и современа патна инфраструктура придонесува кон безбедно одвивање на сообраќајот. Секако дека треба да се нотира дека овозможувањето на соодветен пристап до секој дом или до секое работно место е предизвик за секој регион или општина која сака да обезбеди услови за подобрување на квалитетот на животот на своите граѓани, но и да обезбеди услови за зголемување на инвестициите. Денешната состојба со патиштата, што се предмет на овој проект, е далеку од посакуваната. Улицата се наоѓа во централното подрачје на селото Кочилари. Во моментов е во многу лоша состојба, со коловозна конструкција од земја и не ги задоволува потребите за нормално и безбедно одвивање на сообраќајот. Улицата нема тротоари и банкини, така што жителите директно излегуваат на земјениот пат и во тешки услови ги задоволуваат секојдневните потреби. Состојбата дополнително ја отежнува фактот што и во случај на врнежи претставува опасност од поплави во дворовите на околните куќи. Улицата бр.1 е долга 121 метар и е од големо значење за економскиот развој на самите жители.