ПРОЕКТ ДЕТАЛИ

Општините во Република Северна Македонија, поради постојниот систем на поставеност на работните процеси, се карактеризираат со низок степен на ефикасност во давањето на услугите кон граѓаните во доменот на урбанизмот. Причинители за ваквата состојба се нискиот степен на дигитализација на процесите и податоците на општинско и регионално ниво. Парцијалните дигитални апликации како изолирани решенија за управување со документи и процеси, електронска архива, сметководствени системи и сл, ниту од далеку ја немаат ефикасноста на интегрирани решенија за управување со податоци. Во доменот на урбанизмот и просторните податоци, општините се справуваат со огромни архиви на документација, која е многу тешка за пребарување,чување и управување а можноста за грешка е голема. Од тука, самите процеси на давање на услугите кон граѓаните бараат значителни човечки ресурси, по број, стручност квалитет и организација. За успешно менаџирање на општината, како систем, од основна важност е мапирањето на сите ресурси во општината, со посебен осврт на двигателите на економскиот развој-бизнис секторот. Чиста слика, во секој момент, за структурата на бизнис заедницата во општината е предуслов за привлекување на секој инвеститор, кој сака да го развива бизнисот во општина која има административен капацитет да ги сервисира неговите потреби. Нелегално изградените објекти и процесот на нивната легализација, како информација во реално време, се од исклучителна важност за развојот на општината, од финански но и од просторен аспект. Увидот во состојбата дава основа за планирање на понатамошниот развој. Јасен и транспарентен процес за утврдување на титулар на сопственост е еден од основните индикатори кај странските инвеститори за greenfield инвестиции. Се поголемиот притисок на јавноста и граѓаните ја наметнуваат потребата за отварање на општините кон граѓаните, со ставање на податоци и информации на располагање на нивни потреби. Отворени, дигитални општини за сите граѓани е мото на модерните Европски општини и административни региони. Интегрираниот систем за управување со просторни податоци е неопходен за секоја современа општина. Системскиот пристап овозможува дигитализација на податоците со кои располага општината, нивно централизирано чување и управување, отворен пристап на граѓаните до соодветно контролирано ниво на јавни податоци и солидна фактографска основа за планирање на развојот. Имплементацијата на системот овозможува унапредување на работата во повеќе сегменти: - ИТ секторот на општината добива интегрирана база на податоци и сервиси, а за истите добиваат целосна стручна поддршка, - Секторот за урбанизам добива дигитализација на урбанистичките планови, - Секторот за уредување на просторот добива инвенторизација на урбаната опрема во сопственост на општината, врз основа на која може да ја констатира фактичката моменталната состојба и да планира одржување и развој - Секторот за локален економски развој добива регистар на бизнис заедницата во општината. Модули кои ќе бидат опфатени во целокупниот систем: 1. Обработка на податоци за потребите на Урбанизам - Со овој модул се врши дигитализација на сите постари урбанистички планови што се на сила и кои што се во хартиена форма, како и средување на поновите урбанистички планови како за урбаниот дел, така и за руралните населени места во Општината. Целта на овој модул е да се обезбеди комплетна дигитална база на сите градежни парцели во Општината и преку Општинскиот ГИС портал јавно и транспарентно би се публикувале информациите за максимално дозволените висини за градба, коефициените на искористеност на земјиштето, намената на парцелите, условите за градење и др. Предлог е да се набави по еден деск топ компјутер во секој општински сектор за урбанизам. 2. ВЕБ ГИС платформа и апликација за автоматско генерирање на извод од план - Преку овој систем, официјалниот документ за извод од план со мапите за синтезен, комунален, инфраструктурен план би се издавале за помалку од една минута. Составен дел на овој модул се и автоматско детектирање и принтање на општи и посебни услови за градба. Целта на овој модул е да се унапредат сервисите кон граѓаните и инвеститорите, како и да се зголеми ефикасноста на општинската администрација. 3. ВЕБ ГИС апликативно решение за јавна презентација на урбанистичко планска документација - Ова апликативно решение претставува јавна веб ГИС страна на Општините каде што се публикуваат сите информации поврзани со Урбанизам и Локален Економски Развој, овозможува увид во носењето на урбанистичките планови, како и транспарентно прикажување на општите и посебните услови за градба за секоја градежна парцела во Општините. Модулот има за цел да овозможи поголема транспарентност на Општината кон граѓаните и инвеститорите, со овозможување на пристап до податоци кои ги поседува Општината, а се информации од јавен карактер. 4. Мапирање на сите регистрирани бизнис ентитети и институции во општините - Со овој модул се мапираат со точна локација сите регистрирани бизнис ентитети на територијата на општините со сите свои генералии ( име на фирма, дејност, адреса, телефон, веб страна и итн.) со што граѓаните за свои потреби ќе можат лесно да ги пребараат, да ги лоцираат и полесно контактираат. Бизнис регистарот ќе се користи и за промоција на потенцијалните за инвестиции во општината со што секој заинтересиран граѓанин или инвеститор со едноставно позиционирање на мапа, би добивал просторна анализа и информација за одалеченост на секој тип на бизнис или институција, со што би се креирал иновативен индекс/параметар за квалитет на живеење и работење. 5. Апликација за следење и контрола на процес при легализација на дивоградби - Овој модул на Општините ќе им овозможи локализирање на сите безправно изградени објекти, како и увид во процесот на секое поднесено барање за легализација. Преку извештаи генерирани од системот, Општината ќе има увид за вкупниот број на поднесени барања, вкупен број на легализирани објекти, вкупен број на незавршени процеси при постапката за легализација и слично. 6. Инвенторизација на целокупната урбана опрема во Општините Општината би добила мобилна Андроид апликација преку која на лесен и интуитивен начин би се собирале локации и информации со состојба за: клупи, канделабри, канти и контејнери за ѓубре, итн и истите јавно би се публикувале на општинскиот ГИС портал со што и Општината и граѓаните би имале преглед и увид на инвестициите и тековната состојба.