ПРОЕКТ ДЕТАЛИ

Проектот за валоризирање на туристичките потенцијали во општините во Пелагонискиот регион предвидува спроведување на различни активности во неколку општини во регионот, кои претставуваат една целина во креирање на заедничка интегрирана понуда, со цел искористување на потенцијалите во областа на туризмот со кои располага Пелагонија. Имено,проектот за реконструкција и доградба на полетувалиште во Крушево се однесува на надминување на недостатоците поврзани со инфраструктурата и услугите за параглајдинг како клучен фактор во развојот на динамичен и одржлив туристички сектор во Крушево и регионот. Кога се работи за параглајдингот Крушево повеќе години наназад е домаќин на светски првенства како и бројни меѓународни и регионални настани кои се важни во промоцијата на регионот и државата во овој сегмент. За жал, Крушево како интернационална конкурентна дестинација за параглајдинг нема соодветна параглајдинг инфраструктура. Постојното полетувалиште нема доволен капацитет согласно бројот на посетители, а меѓу нив натпреварувачи и слободни параглајдеристи. Натрупаното полетувалиште резултира со тешкотии и проблеми за натпреварувачите, организаторите на натпреварите и ја доведува во опасност безбедноста на секој од посетителите. Развојот на Крушево и Пелагонискиот регион како туристичка дестинација резултира со посета од мешавина на домашни, регионални и меѓународни туристи. Одредени атракции во Пелагонискиот регион како што се манастирот Трескавец во Прилеп споменикот Македониум (Илинден), Мечкин Камен и Спомен-куќата на Тоше Проески во Крушево, Широк сокак и Хераклеа во Битола, како и бројни други локалитети и културно историски знаменитости во руралните средини, се особено интересни за домашните туристи од различни делови на земјата како и за странските посетители. Крушево е популарна дестинација за високоадреналински спортови, но заедно со љубителите на адреналинот доаѓаат и туристи кои сакаат природа, пешачење, планинарење велосипедизам, рурален, манастирски туризам итн, за што Пелагонија нуди неограничени можности. Во рамките на проектот се предвидува проширување на теренот за полетување со соодветна основа и завршна обработка со висококвалитетна вештачка трева, паркинзи, реконструкција на постојната брифинг зона во амфитеатар од природни материјали - камен и дрво, хортикултурно уредување на просторот и изградба на објекти со административни простории за параглајдерство: состанци, брифинг сали, сала за брза помош, тоалети и простории за придружни услуги како кафетеријата и просторот за одмор. Од друга страна, проектот за регулација на речното корито на река Црна и нејзините притоки се аплицираше во фази поради неговата опфатност и комплексност, одкои досега изведени се 4 фази со финансиска поддршка на МЛС/БРР. Со последната фаза, која е предмет во овој проект, ќе се заврши регулирањето на коритото во делот на партерно уредување за туристички цели. За да се оформи целосно оваа фаза потребно е да се овозможи пристап до локацијата со асфалтирање на Крак 2 во должина од 187.82 м'. Самата река тече низ повеќето Пелагониски општини и има слив на повеќе од 75 % од територијата на Пелагонискиот регион. Црна Река заедно со своите притоки и нејзиниот слив, не само поради водениот потенцијал туку и поради непосредната близина до земјоделските површини претставуваат најголемиот и најважниот воден ресурс од кој се наводнува целиот јужен дел на Пелагониската котлина. Реката Шемница е најзначајната притока на Црна Река во јужниот дел на Пелагонија на која е изградено Стрежевско езеро кое наводнува плодни земјоделски површини и обезбедува техничка вода за РЕК Битола. Покрај водниот потенцијал, по течението на реката има прекрасни недопрени предели со голем потенцијал за развој на руралниот туризам кои не се доволно искористени. Со активностите во проектот за партерно уредување на дел од коритото и обезбедување на потребниот пристапен пат до локацијата, ќе се зголеми можноста домашните и странските туристи да ги посетуваат овие предели. Проектот значително ќе придонесе кон збогатување и интегрирање на туристичката понуда во Пелагонискиот регион, со поврзување на туристичките потенциали на општините Крушево, Могила и Кривогаштани, каде различни видови на туристи ќе можат преку различни типови на тури да ги искусат туристичките потенцијали кои ги нуди Пелагонискиот регион.