ПРОЕКТ ДЕТАЛИ

Одржливиот развој на туризмот и културата како стратешка цел значи искористување на потенцијалите во регионот, на можностите, како и одржување на рамнотежа помеѓу економските, еколошките и севкупните потреби на регионот. Заштита на природната средина и зачувување на автентичноста на туристичките обележја на Дојран се главен приоритет за развој на туризмот во Југоисточниот плански регион. Дојранското Езеро е познато по лековитата вода која покрај прекрасниот пејсаж е главната причина поради за зголемувањето на бројот на посетители по дојранските плажи. Кога ќе се спомне Дојран се мисли на прекрасен езерски пејсаж со мали уредени плажи богати со уникатната лековита кал која е позната и вон границите на државата. Меѓутоа дел од плажите поради природни непогоди и други влијанија се запуштени, обраснати со трска и не се во состојба да се користат. Затоа е потребно да се преземаат мерки истите да се расчистат и уредат со цел да може да се искористи целокупниот потенцијал што го нуди Дојранското Езеро. Уредувањето на просторот опфатен со овој предлог проект се протега од север кон југ од одмаралиштето “Вила Тиквеш” на Елем Турс до плажата “Фук Так” во Сретеново-Стар Дојран, општина Дојран во вкупна должина од 350 метри и променлива должина на попречен појас до максимум 50 метри. Овој простор зафаќа дел од катастарските парцели: КП1511/1,1511/2,1511/3 и КП10767 во КО Сретеново, а во близина на плажата се наоѓа туристичка населба Мрдаја која е погодна за изградба на туристички објекти, продавници и други објекти. Моменталната состојба на оваа локација, која што има огромен потенцијал за развој на туризмот е запуштена и неискористена. Од западната страна локацијата е ограничена и ја тангира регионалниот пат Р-1105 патен правец кој води кон Грција, а од исток езерските води и во моментот претставува земјиште кое е неуредено, неартикулирано и обраснато со вегетација, кое на некои места се забележуваат драстични денивелации и остатоци од градежен шут. Целта на овој проект е да се овозможат услови за уредување на деловите од крајбрежјето каде што беше изградена пешачка патека, а поради покачениот водостој на езерото беше поплавена и уништена од езерските бранови. Ваквите површини треба да се исчистат од остатоците на патеката и потпорниот ѕид према езерото на кој што се потпира насипот од трасата со цел да се створат услови за користење на таквите делови од крајбрежјето за езерски плажи во текот на летните сезони. Со расчистувањето на руинираните површини целта е да се створат услови истите да се посипат со песковит шлунковит материјал кој ќе биде складен за таа намена, а во другиот дел од уредените делови да се предвидат елементи за партерно и хортикултурно уредување и поставување на потребната урбана опрема за овозможување на една функционална целина во улогата на езерска плажа, со што ќе претставува одлична туристичка понуда во Југоисточниот регион. Уредувањето се планира да се изврши со помош на градежна механизација на самиот премин од копното кон езерската водена површина на утврдениот дел од крајбрежјето да се отстранат постојните остатоци од градежен отпад, растителен отпад и вегетација, по што ќе се пристапи кон обликување на крајбрежна косина за побезбеден и полесен пристап во вода. По целата површина планирано е отстранување на површински слој од хумус и нискостеблеста вегетација, интервенција во делот на линиската инфраструктура со што планирано е отстранување на постоечките метални канделабри за осветлување кои не се во функција и отстранување на целата инсталација за нивно напојување со пропратни елементи, како и надоградба и нивелирање на постоечки бетонски канализациони шахти. Исто така, планирано е на одредени места подобрување на подлогата која е со слаба носивост, заситена со подземни води, преку ископ и нејзино отстранување и нанесување на тампон во слоеви за подобрување на истата. На потегот од целата траса присутни се неколку постоечки трговско-угостителски објекти, кои со своите содржини го збогатуваат престојот на овој дел од крајбрежјето и новопланираната плажа. Проектот опфаќа и поставување на партерно уредување со пешачки патека од бекатон за полесно поврзување и комуникација со постоечкото опкружување, заштитена со потпорен sид кон езерските води. Површините предвидени за попесочување најнапред ќе бидат детално исчистени од разни отпадоци и ќе бидат насипувани со автохтон ситен песок во слоеви со височина од 30 см. Деталните активности се дадени во предмер пресметката кој е составен дел на оваа апликација. Овој проект нема да има само влијание врз туристичката понуда и развојот на туризмот, туку и врз целосниот економски развој во Југоисточниот плански регион. Со самото уредување и формирање на оваа плажа, на локалните жители ќе им се отвори можност да нудат одредени угостителски услуги, сместување и традиционална храна, од кои ќе имаат зголемен бенефит за разлика од минатите години. Вложувањето во развој на нови туристички атракции, во овој случај "Хортикултурно и партерно уредување на дел од езерското крајбрежје и формирање на езерска плажа во Дојран", ќе има позитивно влијание врз развојот на туризмот во целиот Југоисточен регион, а тоа ќе придонесе и кон зголемување на економскиот развој. Со реализирањето на овој проект ќе се креира уште едно место, односно ќе има уште една уредена плажа каде понатаму ќе се нудат можности за рекреација и за излет каде граѓаните ќе можат да уживаат во природните убавини.