ПРОЕКТ ДЕТАЛИ

Манастирот Св.Пантелејмон е еден од ретките зачувани во оригиналната форма од нивната изградба. Манастирската црква е градена од византиската династија Комнин во 1164 година, односно од принцот Алексеј Ангел, син на Константин Ангел и Теодора, ќерка на византискиот император Алексеј Комнин. Фреските во оваа црква се вистинските предвесници на западната ренесанса, речиси два века пред фреските на Ѓото во Падова. Двете значајни фрески ,,Оплакувањето Христово“ и „Симнувањето од крстот“ се врвен дострел на византиското сликарство. Црквата, според своите димензии, спаѓа во редот на помалите цркви од типот впишан крст во правоаголен простор, односно комбинација со слободен крст. Црквата со манастирските конаци биле оштетени од силниот земјотрес во 1555 година тогаш се срушил нартексот, а бил уништен и живописот во некој од сводовите. Манастирскиот комплекс е ограден со високи ѕидови, а во изградените конаци во манастирот можеле да живеат десетина монаси. Манастирот Св.Пантелејмон се наоѓа во подрачје со специфични развојни потреби и е од големо значење како за државата, така и за локалната самоуправа. Се наоѓа на падините на Водно, во селото Горно Нерези, каде живеат жители со мешовита национална структура, но без разлика на верската припадност подеднакво негуван, вреднуван и ценет од сите. Манастирот е дел од сите промотивни материјали кои општината ги нуди на домашните и странски делегации, туристи и останати посетители и како дел од целокупната туритичка, културна и историска понуда е од големо значење посебно воделот на афирмација на локалната самоуправа и државата.. Токму во внатрешноста на овој комплекс Општина Карпош со години оддржува манифестација каде се собираат еминентни интернационални и национални сликари и ја запечатуваат убавината на овој манастир. Го доживуваат и творат за него, а потоа во еден духовен мир, оваа реткост заедно со убавините на природата ја пренесуваат во своите држави. Исто така, манастирскиот комплекс е и домаќин на познатата детска ликовна колонија, што исто така ја организира Општина Карпош, каде дечиња од Балканот ги цртаат манастирските убавини, учат за неговата историја и културно наследство и ги пренуваат во уметност. Но, за да продолжи ова, да се зачува она што го имаме со векови, потребно е ние како држава и сите засегнати чинители да вложиме, да придонесеме секој според можностите за да го реставрираме и уредиме овој комплекс за да остане и за нашите идни генерации, како и за генерациите кои доаѓаат од Европа и пошироко, со цел да ја запознаат Македонија, да го запознаат Карпош, да ја запознаат нашата култура, наследство, традиција и да го пренесуваат понатаму. Како годините минуваат така овој објект со текот на времето се "троши", внатрешноста се распаѓа, а со цел да го зачуваме и биде наше обележје и наша предност како регион потребно е и да вложиме и да направиме одредени зафати за негова санација и понатамошно негово користење. Повеќе од потребно е да извршиме реконструкција и рестравација на конаците кои некогаш го симболизираа вистинскиот црковен дух и беа идеално парче од манастирскиот мозаик Моменталната состојба е благо речено - очајна. По заминувањето на стопанственикот кој го стопанисување ресторанот оставена е една многу лоша слика. Од тоа што денес е останато од конаците се трули даски и греди кои освен што ја нарушуваат сликата на комплексот, претставуваат и опасност како за верниците така и за сите посетители. Замената на столаријата е повеќе од неопходна (дрвени врати и прозори), секако проследена со внатрешно уредување и пренамена на одредени простории, менување на подот, но со задржување на стариот стил т.е поставување на бродски под, реконструкција на тоалетите и поставување на нова електрична инсталација во конакот, нов систем за вентилација, нов противпожарен систем за дојава на пожар кој и те како е од големо значење за сигурноста и безбедноста на просториите и самиот манастирски комплекс. Со сите овие интервенции, ќе се врати автентичноста на внатрешниот простор и секако ќе се задржи автентичноста на надворешниот изглед на манастирскиот конак. Идејата е овој комплекс да се изреновира согласно насоките од МПЦ и да стане уште едно монашко светилиште. Манастирот, кој во поновата историја беше познат како ресторан каде што се правеа свадби и веселби, сега тежнее да го врати вистинскиот дух на црковен духовен центар во скопската околина. Откако беше изграден комплексот „Македонско село“, а со тоа и дислоциран ресторанот од манастирот, Синодот на МПЦ ја почнал иницијативата за заживување на овој манастир, како вистински духовен центар со монашко братство. Предвидено е манастирот и понатаму да остане отворен за посетители, односно ќе биде манастир од отворен тип. И уште еднаш да потенцираме, овој манастирски комплекс е од особена важност за општина Карпош, претставува најзначаен културно - историски споменик и е главен симбол на општината за што говори и фактот дека во самиот грб на општина Карпош е вметната ѕвездата од манастирот св.Пантелејмон. Реален проблем за враќање на сјајот на овој комплекс се финансиските средства. Доколку успееме да обезбедиме средства се обврзуваме во соработка со МПЦ да го реализираме проектот преку ангажирање на максимално стручни лица кои би оставиле вечен траг со реставрацијата на овој објект.