ПРОЕКТ ДЕТАЛИ

Постоењето на современа и модерна сообраќајно-транспортна инфраструктура е основен предуслов за поттикнување на развојот на општините. Од аспект на патната мрежа, сите плански региони се релативно добро покриени со магистрални и регионални патишта. Меѓутоа, како резултат на силното фокусирање кон изградбата и реконструкцијата на овие патишта, низ годините запоставено беше вложувањето во изградба и обнова на локалната патна инфраструктура во општините. Несоодветните локални патишта претставуваат пречка во развој на туризмот и другите економски дејности за кои регионите и општините имаат потенцијал. За жал квалитетот на локалната инфраструктура, посебно на сообраќајната не е на задоволително ниво и во општина Вевчани. Потребна е изградба и реконструкција на голем број на локални патишта во општината со цел развој на современа и модерна патна инфраструктура која во целост ќе ги задоволи сегашните и идните потреби на локалното население, но и на голем број на туристи и посетители кои во се поголем број го посетуваат Вевчани. Во изминатите години општина Вевчани беше силно фокусирана кон изградба на нови локални патишта согласно потребите на локалното население. Благодарение на финансиска поддршка од страна на голем број на домашни и меѓународни донатори инвестирани се значителни средства во изградба на локални патишта на територијата на општина Вевчани. Меѓутоа, како што поминува времето, се поголем број на локални улици кои биле изградени во минатото континуирано се амортизираат и оштетуваат и претставуваат проблем во секојдневното функционирање на населбата. Потребни се сериозни вложувања во реконструирање и осовременување на локалната патна инфраструктура. Општина Вевчани како најмала единица на локална самоуправа со ограничен буџет кој не е доволен ниту за покривање на основните трошоци за своето тековно работење, соочена со овој сериозен проблем кој бара огромни вложувања, приморана е проблемот со реконструкција и обнова на локалната патна инфраструктура да го решава преку подготовка на предлог проекти и обезбедување на средства од централната власт или други домашни и меѓународни финансиски институции. За таа цел, се подготвува и овој предлог проект кој има за цел реконструкција и осовременување на локалната улица Даскалој 1 во вкупна должина од 269,78 метри во населено место Вевчани.