ПРОЕКТ ДЕТАЛИ

Општина Струга е туристички град и во текот на туристичката сезона, бројот на луѓе кои живеат или престојуваат во градот се зголемува и за три пати. Со водоводната мрежа на град Струга се поврзани околу 40.000 жители од градот и околните рурални заедници, како и едно село од соседна општина Дебарца. Еден од основните услови за развој на туризмот е и непреченото снабдување со вода за пиење, како и подобрување на квалитетот на водата за пиење. Состојбата на водоводната мрежа во моментот е многу лоша пред се поради староста на водоводната инсталација – околу 50 години, односно дотраеност на инфраструктурата и поради материјалот од кој се изработени цевките (азбест – цемент) кој е канцероген и штетен за здравјето на луѓето, а посебно кога се оштетуваат цевките и тој завршува во водата која се дистрибуира. Во летните месеци поради зголемениот број на корисници на водоводната мрежа, како и поради честите дефекти на мрежата, водоснабдувањето е во прекин и негативно се одразува на развојот на туризмот. Честото настанување на дефекти на водоводната мрежа е предизвикано помеѓу другото и од изведување на несоодветни прекопи на патната инфраструктура и други градежни активности, а тоа се должи на непостоење на мапи на подземната инфраструктура што би помогнало во определување на точната локација на подземната инфраструктура пред да се почне со активности кои потенцијално ја оштетиле истата.Честото санирање на дефектите предизвикува мали парчиња од оштетената азбест – бетонска водоводна инфраструктура да заврши во водоводната мрежа што претставува опасност по здравјето на луѓето, а посебно го зголемува ризикот за појава на канцер. Со замена на азбест – цементните цевки со ПВЦ цевки ќе се намали ризикот по здравјето на граѓаните, а воедно и ќе се намали бројот на дефекти кои го спречуваат водоснабдувањето во општината. Проектот има влијание на здравјето и квалитетот на живот на целокупното население преку подобрување на квалитетот на водата за пиење со замена на старата и дотраена азбест – цементна инфраструктура и намалување на бројот на дефекти и застои во водоснабдувањето.