ПРОЕКТ ДЕТАЛИ

Општина Росоман е рурална општина која се наоѓа во централниот дел на Република Македонија, поточно во тиквешката котлина. Општината се протега по долниот тек на Црна Река и се граничи со општините Кавадарци, Неготино, Градско и Чашка. Територијата на општина Росоман претежно се наоѓа во рамничарски дел, освен мали делови од неа кои се ридско-планински. Според надморска височина од околу 140 метри надморска висина се вбројува во една од најниските во државата. Низ територијата на општина Росоман поминува регионалниот пат П-106 кој ја поврзува вардарската долина со Пелагонија, а воедно претставува и директна врска со коридорот 10, односно автопатот Скопје-Гевгелија, кој минува преку територијата на општина Росоман. Кога станува збор за проблемите со кои оваа општина се соочува, направено е истражување за идентификација на проблеми кои се издигнуваат високо на листата на приоритети на општината. Проблемот со водоснабдувањето во дел од населените места во општина Росоман се уште не е надминат. Токму таков е случајот со село Манастирец. Ова село е сместено во областа Тиквеш и истото е оддалечено 10 километри северно од општина Кавадарци, 19 километри западно од општина Неготино и 5,2 километри јужно од општина Росоман. Во село Манастирец во моментов има недостаток од вода за пиење. Постоечката водоводна мрежа не ги исполнува тековните потреби, додека со предложениот проект тој проблем би се решил. Поради неконтинуирано снабдување на населението со вода за пиење (воведување на рестрикции по 12 часа на ден) и недостаток на услови за редовно одржување на хигиената, се создадоа услови на заразни заболувања (стомачни заболувања, жолтица) и можност од појава на епидемија. Имено, во ова село има изградено водоснабдителен систем, но и покрај истиот, постои голем недостаток на вода, особено во летниот период, кога потрошувачката е значително зголемена. Ова покажува на фактот дека снабдувањето со еколошки исправна чиста вода за пиење во општината, особено во село Манастирец, претставува сериозен проблем кој што е високо рангиран и има потреба од итно решавање. Исто така, потребата за изградба на водоснабдителен систем се јавува и поради фактот што во ова село некогаш живееле околу 500 фамилии но дел од нив се исселиле, а една од причините била немањето на основни услови за живот во однос на комуналната инфраструктура. Од оваа причина, бројот на жители се намалил на околу 350. Со реализација на проектот постои и потенцијал за враќање на одреден број население кое што живеело во ова село, но исто така и поголема посета на селото од тамошните сопственици на викенд куќички. Проектот опфаќа дистрибуирање на вода за пиење преку доводен цефковод со должина од 1.6 км и резервоар за вода за пиење со волумен од 60 м3, од кои понатаму се дистрибуира низ постоечката мрежа до секое домаќинство. Примарната корист ќе биде решавање на проблемот на недостаток на вода за пиење за следните 30 години. Согласно горенаведеното, општина Росоман и село Манастирец имаат потреба од изградба на нов алтернативен систем за снабдување со вода. Крајниот и долгорочен исход од овој проект е пронаоѓање на перманентно решение за снабдување со еколошки исправна и чиста вода за пиење на жителите на село Манастирец, како и спречување на загадување на подземни и површински води, почвата, растителниот и животинскиот свет.