ПРОЕКТ ДЕТАЛИ

Општина Прилеп на својата територија има 59 населени места - градот Прилеп и 58 рурални населени места. Во изминатиот период Општината во континуитет инвестира во подобрување на условите за живот во руралните средини преку подобрување на комуналната инфраструктура, јавното осветлување, патната поврзаност, условите во подрачните училишта, но сепак има потреба од дополнителни инвестиции за обезбедување на современа инфраструктура во руралните населени места. Ова посебно се однесува на подрачјата со специфични развојни потреби каде заради нивното пониско ниво на социо-економски развој, местоположбата и специфичните услови има потреба од поголеми вложувања. Еден од проблемите со кој се соочуваат овие населени места е квалитетот на јавното осветлување. Овде како проблеми се јавуваат недоволната осветленост, честата појава на дефекти чие отстранување е отежнето заради поголемата оддалеченост, појава на дефекти заради честите прекини во снабдување со електрична енергија, поголеми трошоци за одржување, голема потрошувачка на енергија и штетни влијанија (директни и индиректни) врз животната средина. Моменталната состојба во населените места кои се предмет на овој проект се карактеризира со постоење на јавно осветлување со живини и флуоресцентни светилки, кое не е доволно и има голем број на дефекти. Како резултат на ова има недоволна осветленост во вечерните часови, намален комфор, намалена сигурност и безбедност за локалното население, но и за сите гости и посетители на овие населени места. Може да се каже дека ваквата ситуација негативно влијае и на атрактивноста на населените места кои заради нивната местоположба и природни убавини и културното наследство имаат и потенцијал за развој на рурален туризам, а често се наоѓаат и на патеките за алтернативен туризам (велосипедизам и маунтбајк тури, планинарење, пешачење, планинско трчање, болдеринг, џип тури и сл.) кој е доста развиен во Општина Прилеп. Со реализација на овој проект ќе се се даде и придонес кон создавање на предуслови за зголемување на инвестициите од приватниот сектор во рамки на ИПАРД програмата, како дел од пошироките активност на Општина Прилеп кои вклучуваат и изработка на урбанистички планови за сите населени места. Од претходно наведеното можеме да кажеме дека има голема потреба од реализација на предлог проектот „Замена на постоечкото улично осветлување со штедливи LED светилки во руралните подрачја на Општина Прилеп“ со што ќе се придонесе кон подобрување на квалитетот на живот во руралните населени места во Општина Прилеп а ќе се придонесе и кон заштита на животната средина.