ПРОЕКТ ДЕТАЛИ

Опис на проектот: Од 2015 год, генерирање на комунален отпад по глава на жител се зголемува во државата, при што се движи приближно 285-350 кг. Континуираниот раст на комуналниот отпад и несоодветното управување предизвикува загадување на животната средина. Општина Арачиново и партнерските општини во голема мера се потпираат на депонирање на комунален отпад, при што значителни количини на отпад завршува на нелегални депонии. Општина Арачиново, рурална општина со вкупно 11.992 жители, е една од најслабо економски развиените општини во земјата. Во моментот, се проценува дека постојат 2.450 домаќинства со вкупно 11.992 жители, распоредени во четири рурални населени места: Арачиново, Орланце, Грушино и Мојанце. Општината се соочува со значителни потешкотии во обезбедувањето организирани и систематски услуги за собирање на комунален отпад. Поради ограничените финансиски капацитети, општината нема доволно инвестиции во инфраструктурата и нова опрема за соодветно собирање и отстранување на отпадот. Како резултат на ова, комуналниот отпад често се депонира на повеќе од 4 нелегални депонии, што претставува сериозна закана за јавното здравје и животната средина. Дополнително, поради фактот што отпадот често не се собира и транспортира целосно ниту претходно се третира, на овие нелегални депонии често доаѓа до палење на отпадот, што предизвикува значителни еколошки штети, вклучително загадување на воздухот, почвата и водите. Најважно од сè, неконтролираното горење на отпадот може да предизвика пожари на отворено, што носи сериозни ризици за имотите и добросостојбата на жителите. Покрај тоа, близината на Општина Арачиново до Град Скопје значи дека сегашната состојба претставува не само еколошка и здравствена закана за 12.000 жители на Арачиново, туку и за повеќе од 500.000 жители на Град Скопје. Поради овие причини, предлог проектот предвидува Изградба на собирен центар со селектирачка линија за комунален отпад во Арачиново, Минимален капацитет на сортирачката линија е 8т дневно и ќе овозможи селектирање и обработка на различни видови отпад од собираниот комунален отпад. Процесот на сортирање во постројката за селекција на отпад вклучува неколку чекори: Собирање на отпадот од различни извори и негов транспорт до постројката за селекција. Пред-сортирање и отстранување на опасни и големи предмети, кои можат да ја оштетат опремата за сортирање. Сортирање преку комбинација на рачни и механички методи, со раздвојување на отпадот според неговиот состав, како што се: • Хартија • Стакло • Метал • Органски отпад • Резидуален (неупотреблив) отпад Обработка на отпадот за негово повторно искористување или отстранување, како и правилно депонирање на отпадот кој не може да се реупотреби. Оваа инвестиција ќе придонесе за поодржливо управување со отпадот, намалување на количината на депониран отпад и зголемување на можностите за рециклирање и повторна употреба на материјалите.