ПРОЕКТ ДЕТАЛИ

Во моментот во населените места во Општина Ново Село постојат многу земјени улици кои поради нивната сегашна состојба го отежнуваат движењето на населението и нивната поврзаност со останатиот дел од општината. Таков е случајот со населеното место Самоилово, каде сегашната состојба е доста неповолна. Земјените улици, кои се предмет на овој предлог проект и имаат потреба од реконструкција, при обилни врнежи од дожд или снег тие се претвораат во калливи терени кои дополнително го отежнуваат движењето и поврзаноста на населението. Оваа доведува до постојана ерозија и постојана потреба од полнење на преостанатите дупки со уште повеќе земја. Во топлите периоди во годината, земјените улици се доста суви и при движење на моторните возила или при појава на ветер, се создаваат услови за кревање и разнесување на големи наноси на прашина со што се загадува воздухот на семејствата кои живеат директно на овие улици. Според Одлуката за определување на подрачјата со специфични развојни потреби во Република Северна Македонија во периодот 2020 - 2024 година („Сл. Весник на РСМ“ бр. 263/19) населеното место Самоилово, Општина Ново Село е определено како „рурално подрачје“ и спаѓа во Листа бр. 1 од одлуката. Овој предлог проект се однесува на реконструкција на постоечки улици (Улица 1 и Улица 2) во населеното место Самоилово, Општина Ново Село. Предметните улици опфаќаат вкупна должина од 404,9 метри или пооделно Улица 1 со должина од 138.3м и Улица 2 со 266.6м должина. Вкупното население во Самоилово, според пописот од 2002 год., изнесува 348 житела (179 мажи и 169 жени). Директни корисници на резултатите од проектот се околу 120 житела, што представува 34,5% од вкупното население на с. Самоилово. Предметните улици се во употреба повеќе години и истите немаат соодветна коловозна конструкција, односно постоечките улици се земјени. Поради лошата состојба во која моментално се наоѓаат предметните улици и нивното влијание врз безбедноста на сообраќајот, како и безбедноста на жителите се наметнува потребата од реконструкција на овие улици. Предметните улици, кои се дел од овој предлог проект, беа избрани за приоритетни од страна на населението на состанок со градоначалникот одржан во склоп на месната заедница на с. Самоилово (месните заедници сеуште постојат и функционираат на локално ниво иако повеќе не претставуваат правни субјекти). Реконструкцијата на улицата е важна од неколку аспекти меѓу кои се здравјето и безбедноста на жителите кои живеат во непосредна близина како и од земјоделски аспект, со решавање на горенаведените проблеми директно ќе се влијае врз стимулирање на земјоделското производство и зголемување на безбедноста при обработка на земјоделските површини