ПРОЕКТ ДЕТАЛИ

Општина Вевчани е единица на локална самоуправа која се наоѓа во Југозападниот плански регион на Република Северна Македонија, со вкупно население од 2.433 според последниот официјален попис од 2002 година со вкупна површина од 35км2 и едно населено место. Општина Вевчани е една од најмалите општини во државата, со буџет кој не е доволен дури и за покривање на тековните трошоци од работењето, односно една од финансиски најслабите локални самоуправи со статут на рурална општина. Вевчани изобилува со природни богатства и културно наследство и претставува препознатлива туристичка дестинација. Во изминатите три години општина Вевчани вложи големи напори со сопствени и надворешни финансиски средства да ја подготви потребната техничка документација за реконструкција и изградба на комунална и патна инфраструктура на територијата на општината. Меѓутоа, како најмала рурална општина со едно населено место, локалната самоуправа се соочува со бројни предизвици и потешкотии во остварувањето на усвоените стратешки цели и своите надлежности, особено поради малиот и ограничен буџет со кој располага општината и недостиг на стручен кадар. Поради ова, општината е приморана изградбата на основната инфраструктура со цел создавање на квалитетни услови за живот на локалното население да ги обезбедува со финансиски средства од централната власт, други домашни или меѓународни институции. Целта на овој предлог проект е решавање на проблемите со кои секојдневно се соочува населението кое живее на предложените улици и кои секојдневно бараат од општината да им овозможи пристојни услови за живот, односно да добијат современа патна инфраструктура за пристап до своите живеалишта, со оглед на фактот дека до денес тие стигнуваат до нив по пробиен земјен пат или делумно асфалтиран најчеесто со сопствени извори. Од друга страна реализацијата на овој предлог проект ќе има позитивен ефект и бенефит и за целото локално население како и за посетителите на Вевчани како препознатлива туристичка дестинација, бидејќи дел од предложените улици се наоѓаат односно се краци на главни улици кои водат до Споменикот на природата „Вевчански извори“ и дел од угостителските објекти за храна и сместување во Вевчани. Исто така на овие улици нема поставено соодветно улично осветлување, така што по реконструкцијата на локалните улици ќе се постави истото и ќе даде значителен придонес во зголемување на безбедноста и сигурноста при движењето на граѓаните низ населбата. Улицата Даскалој – Обиколница се спојува со крак на регионален пат Р2250 кој пак води до Здравствениот дом Вевчани и угостителски објект како и до патот по кој се стигнува до соседната населба Октиси. Со предлог проектот ќе се реконструираат четири локални улици, и тоа: Реконструкција на локална улица „Радини1“; Реконструкција на локална улица „Млака-Ветерник“; Реконструкција на локална улица „Даскалој-Обиколница фаза 2“; Реконструкција на локална улица „Пупини-Ќежој“ со вкупна должина од 385,5м’. Со овој предлог проект ќе бидат опфатени околу 70-тина домаќинства односно околу 280 граѓани кои ќе имаат директен бенефит.