ПРОЕКТ ДЕТАЛИ

Селото Радолишта е рурална населба во општина Струга со население од околу 6.000 жители и се наоѓа во близина на автопатот Струга - Ќафа Сан кај границата на Република Македонија со Република Албанија. Иако е рурална населба, Радолишта има карактер на мала градска населба поради големиот број на жители и печалбарскиот карактер. Во селото има голем број на бизниси претежно од градежништвото, но и од другите стопански гранки. Бизнисите се претежно сместени во долната зона на селото поради пристапноста на теренот и близината на автопатот кој води кон границата со Република Албанија. Во моментот оваа локација не е опфатена со комунална водоснабдителна мрежа, туку со вода се снабдува со индивидуални бунари кои често не се бактериолошки испитани и каде снабдувањето со вода е често условено од нивоата на подземните води во одредени периоди во годината. Поради ваквата состојба, се јавуваат одредени потешкотии во функционирањето на бизнисите, но и на домаќинствата во проектната област. Поради големиот број на печалбари од селото од кои дел веќе инвестирале во отворање на нов бизнис, постои голем потенцијал за привлекување на нивните инвестиции и отворање на нови бизниси во оваа рурална средина, меѓутоа немањето на водоснабдителна инфраструктура во голема мера го спречува реализирањето на оваа идеја. Со довршување на новиот водоснабдителен систем ќе се елиминира недостатокот на вода за пиење и евентуалните прекини на водоснабдувањето кои би произлегувале од ниското ниво на подземни води во бунарите кои се користат во моментот. Дополнително ќе се создадат услови за отворање на нови бизниси и привлекување на инвестиции од печалбарите од овој крај. Со отворање на нови бизниси ќе се намали стапката на невработеност што непосредно влијае врз порастот на животниот стандард и квалитетот на живот. Овој проект се состои од вде фази од кој првата фаза е реализирана и со втората фаза која е исто така и завршна фаза проектот целосно ке биде завршен.